Ang gugma sa Dios

Adunay panultihon gikan sa mga Carmelites: “Sa Dios nga nahigugma sa kalag, wala niya sud-onga kini sa mga mata sa kabantog, hinunoa, iya kining gisud-ong diha sa Sukaranan sa Pagkamapaubsanon.”

Dili ikalimod nga bisan unsaon pa nato og pagpasiatab nga ang tinuod nga kaambong ug kaanyag dili panggawas apan anaa sa kahiladmang aspeto sa pagkatawo apan padayon natong gidayeg ang mga ambongan ug mga maanyag. Kinahanglang pleasing personality ang requirement kanila nga motrabaho labina sa mga pangpagwapa nga mga produkto.

Sa laing bahin padayon natong gitamay ang mga dili hitsuraan. Bisan kun padayon kitang moingon nga ang kwarta dili mahinungdanon kay mahinungdanon ang relasyon sa pamilya apan daghang mga tawo ang sa gihapon magpatay gumikan sa kaagap.

Bisan kun makapila kita makadungog sa mga wali ni padre nga ang gahum ug kasikat lumalabay lamang apan padayon kitang mangindahay nga mosikat unta kita sama ni Diiwata Pares. Ning paagiha nagkasungi ang atong gipangandoy ingon man ang tinud-anay nga kahimtang sa atong kaugalingon.

Ang Dios wala mohukom kanato segun sa atong kahimtang ug angayang pagahimoon aron kita maisip nga takus alang kaniya. Ang tanan natong nakab-ot dili maoy sukaranan aron kita higugmaon sa Dios. Ang mga kalampusan usahay maoy mamahimong gabok sa atong kaluwasan sanglit nahimo naman hinuon kitang mapahitas-on. Maglisod ang Ginoo pagsulod sa atong kinabuhi kay ang pagkamapahitas-on maoy trangka sa atong espirituhanong paghamtong.

Ang pagkamapaubsanon mao man ang paghabwa sa tanang mga kabalaka ug mga gitinguha sulod sa atong kasingkasing ug ang pagtugot sa kabubut-on sa Dios nga maoy modumala alang kanato. Dugang pa, ang pagkamapaubsanon usa man ka gamhanang hinagiban batok sa yawa. Ang yawa nga mapahitas-on dili mabuntog pinaagi sa pagkamapahitas-on kondili pinaagi sa pagkamapaubsanon.

Ang pangalagad sa kalingkawasan ug sa eksorsismo dili man garbosong pasundayag sa Diosnong Gahum hinunoa, pasundayag kini sa dakong gugma sa Dios. Sa kaulahian, ang mapaubsanong pag-angkon sa atong pagkamasalaypon batakang sukaranan man sa kabag-ohan ug kapasayloan.