Dili puyde distrubo

Dili na pwede magtrabaho sa mga dalan sa dakbayan sa Sugbo sa mga panahon nga tingsakay kaayo. Kini kun maaprobahan ug mapatuman ang Anti-Road Disruption Ordinance sa dakbayan sa Sugbo nga gipalabang ni konsehal Nestor Archival.

Ang konsehal nakahuna-huna sa iyang sugyot nga ordinansahon human kini makamatikod nga ang mga gihimong konstraksiyon sa mga ahensiya sa gobiyerno ug mga pangpublikong utilities sa kadalanan nakadugang o nakatampo sa suliran grabing ka huot sa trapiko. 

Ang Seksiyon 4 sa gisugyot nga ordinansahon nagkanayon nga supak sa balaud ang pagpahigayon sa mga pang publiko ug pribadong utilities og konstraksiyon nga trabaho sa kadalanan sa dakbayan sa Sugbo gikan sa oras ika unom ngadto sa ika napulo sa buntag ug ika upat ngadto sa ika unom sa gabii.

Ang nahisgotang ordinansahon anaa na kini karon sa komitiba sa balaud sa konseho sa dakbayan sa Sugbo aron matun-an kini. Gawas sa pagdili sa konstraksiyon nga makabalda sa dagan sa trapiko ang gisugyot nga ordinansahon gusto usab nga didan niini ang mga balda sa sumasakay, negosyo ug transportasyon nga makamugna og pagkawagtang sa oportunidad ug krisis sa ekonomiya.

Ubos sa ordinansahon ang mga makalapas makabayad og usa ka libo ka pesos sa unang kalapasan, duha ka libo sa ikaduhang kalapasan ug tulo ka libo ikatulong kalapasan.Samtang ang makahimo sa ika upat ug ikalima nga kalapasan pabayron og lima ka libo ka pesos o prisohon sulod sa napulo ka adlaw o prisohon ug pamultahon.Pabayron usab og lima ka libo ka pesos ug suspensohon og ubos sa tulo ka buwan ang business permit sa mga pribadong utilities.

Ang City Transportation Office maoy tahasan sa pagpatuman kun maaprobahan sa konseho ug sa Mayor ang gisugyot nga ordinansa samtang ang Department of Engineering and Public Works mao ang magregulate sa mga konstraksiyon nga pagahimuon.

Dili ba makalangay sa paghuman sa mga konstraksiyon sa kadalanan ang gisugyot nga ordinansa nga makapataas hinuon sa pag antos sa katawhan sa suliran sa trapiko.