EDITORYAL— Road safety sa pagbakasyon

Karong semanahona mao ang pagtimaan sa Semana Santa sa mga Kristiyano ilabi na sa mga Romano Katoliko. Samtang tuod og panahon karon sa pagpamalandong ug pagkonektar sa espirituhanong relasyon ngadto sa Kahitas-an, dunay uban nga giisip kining panahon sa pagbakasyon sab.

Dunay mga pamilyang mobiyahe gyud og layo aron ikauban ang ilang mga kabanay sa pagbakasyon. Mamauli ang uban sa ilang mga probinsya ilabi na kadtong mga nanarbaho ug dinhi na namuyo sa mga siyudad.

Ang panahon sa Semana Santa lang  para sa uban makahigayon og pauli samtang ang uban para gyud maglingaw-lingaw sa ilang kaugalingon pinaagi sa pagbiyahe sa lagyong mga suroyanan.

Sa pagbiyahe, kung magdala og kaugalingong sakyanan kinahanglang siguraduhon nga maayo ang sakyanan ug kompleto sa kinahanglanon aron dili maaberya ug labaw sa tanan, luwas silang makaabot sa destinasyon ug makauli balik.

Sa mga responsableng drayber dili gyud mawala kanila ang preparasyon sa dili pa sila mobiyahe ilabi na kun layo ang ilang adtuon ug kauban ang ilang pamilya.

Ang simple nga tamdanan para sa mga drayber mao kining “BLOWBAGETS.” Usa kini ka tamdanan aron dili malimot ang drayber nga kinahanglan nilang buhaton o tan-awon sa dili pa sila molarga.

Ang BLOWBAGETS nangahulogan og: Brakes, Lights, Oil, Water, Battery, Air, Gas, Engine, Tires, and Self. Pinaagi niini,malikay gyud sa aberya ang mga biyahidor.

Sa pikas bahin, dili sab dapat makalimtan ang rehistro sa sakyanan ug lisensiya. Dili sab biyaan ang mga nakasaksak nga mga electrical appliances ug i-disconnect ang supply sa gas stoves, siguraduhong sirado ang balay kun walay mabilin.

Dili kalimtan ang disiplina samtang nagmaneho aron dili maaksidente o makaamong sa uban.