EDITORIAL — Balaod ug silot pangontra sa fake news

Walay laing makapahunong aning pagkatap aning mga fake news, deep fakes, misinformation ug disinformation diha sa social media kondili ang mismong gobiyerno pinaagi sa pagpanday og mga balaod nga mosilot niadtong mga mobuhat niini.

Sa pagkakaron, ang mga lehitimong media outlets, bisan kadtong mga gipanag-iya og mga politiko, mao ray bugtong naningkamot sa pagkorihir sa mga dili maong gipakatap diha sa social media pinaagi sa paghimo og fact checking.

Apan dako kining hagit sa mainstream media, kay sila na maoy target sa pagpangdaut sa mga trolls o tighimo aning mga fake news.

Nagsugod kaning tanan gikan sa mga politikong di gustong ukayon sa media ang ilang mga baho, anomalya, takuban, mga krimen ug uban pang binuang nga ilang gipanghimo aron makadaog.

Kung dunay kwartang pangsuhol kinahanglan lang nila manuhol og mga content creators, graphics, video editors, sound o audio editors, AI experts, ug daghan pang uban nga suhito sa internet ug teknolohiya aron pagbuhat og mga contents nga ipa-post sa lain sab grupo sa mga suholang tawo nga gitawag og trolls.

Kaning mga trolls suholan paghimo og gatosan ka social media accounts nga ilahang mentinahon walo ka oras kada adlaw sama og mao na gyud kini ilang trabaho kada adlaw.

Tig-post sa contents nga pangdaut sa kontra, pagpahumot sa kaugalingon, paghimo og fake news ug uban pang binuang apil na ang pag-atake sa mainstream media aron ipagawas nga dili kini patas.

Ang tumong niini, ilaron ang mga tawo aron patuohan sa kung unsa ilang gusto, apil na niini ang pag-agni sa mga tawo nga silay botaran sa eleksyon.

Tungod sa kamaayo sa tighimo niini, dili makamatikod ang mga netizens sa binuang, bisan ang Facebook o Meta nailad sab.

Nakatabang pa gani ang Meta pagkuyanap aning fake news kay dugay sila makamatikod sa binuang.

Ang Meta otomatikong mobutang og mga contents diha sa timelines sa social media user kun ma-detect niini nga nakig-engage kini sa mga ingon aning klaseha sa contents. Ang resulta, kada adlaw mga ingon ani lang tanang linya nga contents ang imong mabasa, na-brainwash na ang tawo.