Kalye survey katuohan-kasaligan

Nagkaduol na ang adlaw sa midterm nga piniliay, Mayo 12, 2025. Tanang partido nag-iyahay'g panggawas, misuroy sa lainlaing lugar, nagpakita sa ilang hinulamang pahiyom, nagpagunit sa ilang bukton ug nagpapig-it sa ilang mga palad, nga kaniadto dili gayud magpahikap sa bulingit-kubalong palad sa mga kabos.

Sa social media, mibaha nagkadaiyang pre-election survey agi'g pakita unsang partidoha ug kinsang mga kandidatoha ang kinakusogan: Ang Team Duterte-Suka o ang Team Marcos-Sinusuka? Sa mga SWS-Pulse-Asia-Octa ug uban pang surveys gipagawas nga may duha o tulo ra ka kandidato sa pagka-senador ubos sa Team Duterte ang nasulod sa top 12. Samtang sa Team Marcos, 9. Ug kasaligan ba kining maong surveys? Big No!

Una, wala nato makita giunsa nila kini pag-umol? Ikaduha, ang tanang dapit ba sa Pilipinas ang gikuhaan nilag pre-election survey, o namili lamang? Basin baya og didto ra sila sa mga lokasiyon nga balwarte sa partidong maoy ilang gipaboran tungod sa tinipigang rason nga sila ray nasayod? Busa, unsaon man sa pagkahimo niining kasaligan?

Sa laing bahin, may good governace vloggers, kinsa boluntariyong mipahigayog kinaugalingong pre-election Kalye Survey: Team Duterte-senatorial candidates vs. Team Marcos Migahin silag igong higayon pagbulad sa init, paggasto sa ilang kaugalingong kuwarta ug uban pang matang sa sakripisyo diha sa ilang personal nga pakig-atubang sa lainlaing taras sa mga tawong ilang gipangduol-gipangsukna, diin migula nga ang Team-Duterte maoy inilog pirme.

Tanang lihok ug panagkukabildohay diha sa ilang pag-survey, nakarekord-‘uncut’, sanglit may dala man silang modernong kahimanan nga pang-video. Ug busa, makita live sa social media. Purely organic ug walay hokuspokus! Luzon-Visayas-Mindanao gi-pre-election survey sab nila. Hasta balwarte sa mga Marcos-Pinklawans-Dilawans ilang gisulod. Diin, daghan tuod mipabor sa Team-Marcos, pero mas nag-awas-awas ang mipili-pinig sa Team-Duterte.

Mi-match-haom kini sa tanang political rally sa Team-Marcos ug Team-Duterte sa nagkalainlaing rehiyon. Diin ang Team-Duterte pirmeng gipuno ang venue sa mga dumadapig, kinsa puno sa kinabuhing namakpak-naninggit: “Duterte! Duterte!”

Samtang ang Team-Marcos, bisag gilawagan nag Ayuda ang mga nanambong, walay kadasig nga mobawos sa nagpunay'g warawarang Bongbong Marcos. Ug ang sakit, kay bisag gimandaran na sa pro-BBM organizers nga mosinggit og ‘BBM’, ang gisayigit sa katawhan, “Duterte! Duterte!”

Pulidong resibo. Nga ang Kalye Survey, katuohan-kasaligan!