Misteryo sa BYD Tang
Kon tuohan ang pangangkon ni kanhi Cebu City Mayor Raymond Garcia nga giuli nila ang P4.4 milyones nga BYD Tang ug walay bisan usa ka dako nga nabayad ang City Hall, martir ang dealer nga Hyundai Cebu Inc. sa pagsugot nga:
Gigamit sa hepe sa Office of the Building Official (OBO) ang electric SUV ug gibandera sa social media nga gipasakyan sa iyang mga higala sulod sa kapin sa upat ka buwan (Pebrero hangtod Hunyo karong tuiga) una giuli;
Gi-rehistro na sa ngalan sa Cebu City Government; ug
Gibilin pang charger sa parking lot sa City Hall.
* * *
Gisukwahi sa mga dokumento nga nahipos ni Bise Mayor Tommy Osmeña ang pangangkon ni Garcia nga human giaprobahan ang pagpalit sa BYD nikonsulta dayon siya sa Cebu City Legal Office:
Giaprobahan niyang procurement request sa Hunyo sa niaging tuig pero naabtan og kapin sa tuig una mangayo og legal opinion sa Hunyo karong tuiga; ug
Wala mopasabot si Garcia kon may labot bang iyang pagka-pilde sa eleksiyon niadtong Mayo 12 sa pagkonsulta sa mga abogado sa City Hall, nga angay untang gihimo sa wala pa dili human na sa transaksiyon.
* * *
Gisukwahi sab sa mga dokumento ni Osmeña ang pag-insistir nilang Garcia ug OBO Head Florante Catalan nga wala gamita kon dili gi-inspeksiyon ug gi-test lang ang BYD sulod sa usa ka semana:
Pebrero 4 karong tuiga, gi-deliver sa Hyundai, gidawat ni Catalan ug gi-inspeksiyon sa mayor’s office ang BYD Tang;
Abril 4 karong tuiga, giluwatan sa Land Transportation Office og official receipt ug certificate of registration ang BYD sa ngalan sa Cebu City Government; ug
CCTV sa City Hall parking lot nagpakita nga gikabay-an ni Catalan ang BYD hapit kada adlaw sa Pebrero hangtod Hunyo karong tuiga.
* * *
Angay sang ipasabot ni Hyundai Cebu Sales Manager Garrick Halican kinsay iyang kasabot sa pag-overprice sa BYD Tang nga tag-P3.3 milyones ra. Mao ba ni hinungdan nga nisugot silang i-uli ang kulatado nang sakyanan?
Sa mga nahibulong nganong Hyundai maoy gipalitan sa BYD, posibleng katin-awan mao nga ang duha ka kompaniya ubos sa Onglatco Auto Group nga gipangulohan ni BYD President ug Chief Executive Officer Edward Onglatco.
* * *
- Latest
