Aksiyon mayor ug vlogger

Gipatawag ni Cebu City Mayor Raymond Alvin Garcia ang mga opisyal sa Department of Public Works and Highways (DPWH) human nasangit sa flyover ang firetruck nga nagtubag og sunog niadtong adlaw nga huwebes sa dalan A.S Fortuna Barangay Banilad dakbayan sa Sugbo.

Tumong sa pagpatawag mao ang paghimo og pagtuon sa mga nagbarog nga mga flyover sa dakbayan sa Sugbo diin giingon sa mayor nga mao ang may hurisdiksiyon.

Wala kaha ka masayop og pamaghot ani, aksiyon mayor? Nganong ang taga DPWH man ang imong gipatawag? Sama ra nga imong giingon niini nga ang nadasmagan maoy sad-an. Dili ba ang bombero maoy sadan ani mayor?

Kanang flyover dugay na nang nagbarog diha sa dalan. Dugay na pud nagsige og agi-agi ubos sa flyover ang mga firetruck, apil na niini ang fireladder ug niadto lang Huwebes nasangit ang firetruck.

Dili ko motuo nga sa kadaghang sunog nga nahitabo sa Sugbo kadto lang higayona nakaagi ang firetruck nga nasangit? Ibotang ta nga kadto lang higayona kini nakaagi, ngano kaha? Kay nakahibawo ang driver nga masangit ang firetruck kun adto siya moagi? Lain na ang driver? Wala diay sultihi ang bagong driver sa nakahibawo?

Siguro naglingo-lingo ug wala makasabot ang taga DPWH sa aksiyon sa mayor maong ila kining gi-snub.

* * *

Sa akong pagsabot, nangandam nang daan si kanhi Senador Kiko Pangilinan sa iyang kapildihan karong umaabot nga bugnong lugaynon. Siguro laraw ni Kiko Pangilinan nga mag-vlogger human sa iyang kapildihan.

Basi kini sa mga video nga atong nakita sa iyang pagpangampanya. Sa video nakita nga nagkaon si Kiko og kan-on nga gisulod sa takob sa kaldero nga iyang gibahogan og gatas sa kabaw nga iyang giasinan. Giapil pod niya og kaon ang dahon sa saging nga giputos sa kan-on.

Sa akong kapobre, wala pa ko kasuway kaon og dahon sa saging. Nakasuway na hinuon ko kaon dahon sa gococola ug insulin plant kay tambal sa diabetes.

Siguro kay maglisod og kopya si Kiko ni Boy Tapang nga gimodmod ang iyang nawong sa hugaw sa kabaw, ang gihimo sa kanhi senador iya nalang gibahogan og gatas sa kabaw ang iyang kan-on ug giasinan.

Makakuwarta na niini si Kiko isip vlogger kay milyones na ang iyang views.