Balik Eskwela na

Pagkadali ra gyud sa panahon, mobalii naman pud diay sa klase karong adlawa ilabi na sa mga pampublikong tunghaan. Mora'g kagahapon pa man to nag-closing apan opening naman dayon pastilan. Bitaw suportahan nato ang pangandoy sa mga bata nga makabaton sila og edukasyon kay kini ang atong ilabilin nila nga dili gyud mahilis ug labaw na nga dili mailog ni bisan kinsa.

Namalit mi kagahapon og mga school supplies sa mall sa dakbayan sa Lapu-Lapu, hilabihan ka daghan usab ang kadungan namo nga namalit, mga last-minute shoppers kay sama nako nag-agad ra pud sa budget kanus-a maabot lisod ning apeki pud ang atong budget. Bisan og medyo mahal ang presyo apan gikinahanglan nato nga paliton kay mao man ang gipangayo sa tunghaan.

Kaniadto sa panahon nako dili man ingon karon ka daghan sa mga notebook ang gi-require basta naa lay masulatan. Gani ang kadtong mga sobrang notebook sa akong mga magulang ang daginoton basin naa pay panid nga wala magamit. Karon color coding naman ang ilang mga notebook. Lahi man ang kaniadto ug karon maong piyongan nalang nato ang presyo sa mga school supplies.

Nabalik naman diay sa naandan ang panahon ting tungha ug nagpasabot nga balik na sa normal ang tanan ilabi na sa sitwasyon sa panahon diin sa nakalabay'ng mga tuig human sa pandemic nagsige og reklamo kay panahon sa summer nagklase pa man maong perting inita. Karon dili na na matagamtaman, hinaut pa unta.

Apan ang angayan nga bantayan karon ang epekto sa uwan kay gamay'ng bundak lang makamugna naman kini og dakong baha diin hasol kaayo sa mga bata ilabi na kadtong bahaanan ang ilang eskwelahan. Gawas pa daghang mamugna nga balatian sa epekto sa ulan sama sa dengue ug uban pa. Hinuon gipangandaman na kini sa DepEd ug sa mga lokal nga kagamhanan nga dili gyud makaapekto sa mga tinon-an.

Samtang usa sa mahinungdanon nga tutokan ang seguridad sa mga eskwelahan diin katambayayong sa DepEd ang Philippine National Police nga mikomiter na sa hugot nilang suporta sa mga tinun-an.

Magbutang sila og mga Police Assistant desk sa mga tunghaan aron adunay daling masampit ang mga nanginahanglan.

Labaw sa tanan, ang mga ginikanan ang numero uno nga maghatag og kasigurohan sa ilang mga anak pinaagi sa pagsilsil sa alimpatakan sa mga bata sa angayan ug dili angayan nga buhaton aron luwas gikan sa mga peligro sa ilang palibot.

Gikinahanglan ang panagtambayayong sa tanang stakeholders alang sa malamposon nga pagpanalipod sa mga tunghaan magsilbeng ikaduhang pinoy-anan sa mga bata.

Amping mga bata, ug sa mga magtutudlo taasi ang inyong pasensiya sa mga bata kay kamo ang ilang mga ginikanan sa eskwelahan. Kong mapupos ang pasensiya tawaga ang ginikanan aron masayod sila sa kinaiya sa bata kong naa sa sulod sa eskwelahan aron sa ingon mao kini ang momaymay o mopasabot nga magbinuotan sa pinuy-anan ug sa tunghaan.