Gubat batok sa paggamit og rugby

Gitutokan karon sa kapolisan sa dakbayan sa Sugbo ang problema sa mga batang libod suroy nga nagumon sa paghingos og rugby.

Kining problemaha dugay na kaayo dili lang sa dakbayan sa Sugbo kondili naa usab kini sa ubang mga dakbayan.

Kon mosuroy ka ilabi na mga skywalk sa syudad naay mga bata nga maghingos og rugby.

Matud nila nga pampawagtang kuno sa gutom ang paghingos og solvent kay tripping nila diin ang uban matulog, samtang ang uban mawad-an og kahadlok nga mangilog na og pagkaon sa mga tawo nga ilang masugatan.

Nganong hangtod karon wala man gihapon masolbad? kaniadto dunay mga rescue operation ang gipahigayon sa mga otoridad apan inig human og tugyan ngadto sa Parian Drop-in Center makalingkawas ra man gihapon ilabi na kon kuhaon sa mga ginikanan, ang uban mangikyas.

Samtang ang mga nagbaligya og rugby wala man matutoki, walay nadakpan ug nasilotan busa padayon ang supply sa rugby.

Sa paglingkod sa bag-ong pangulo sa Cebu City Police Office nga si Col. Gemma Vinluan usa sa iyang gihatagan og pagtagad ang sitwasyon sa mga bata sa kadalanan nga gahingos og solvent.

Mipahigayon na ang CCPO og halapad nga rescue operation sa mga bata sa kadalanan.

Gustong masustiner ni Col. Vinluan ang programa sa pag-agak sa mga bata balik sa tarong nga kinabuhi pinaagi sa hugot nga pakig alayon sa city government, mga non government organizations ug sa katawhan.

Nihangyo na ang CCPO sa mayor sa Mayor Edgardo Labella nga unta mahatagan og usa ka formation center alang sa mga bata.

Gawas sa mga bata gitutokan usab sa kapolisan ang pag gukod sa mga tawong namaligya og rugby.

Aduna nay nadakpan nga namaligya og minudo o tingi tingi nga rugby sulod sa plastic, unta masampolan sila nga mapasakaan og kaso dayon masilotan. Seguro mas maayo apilon ang mga tindahan o hardware nga dili sila mobaligya og rugby ni bisan kinsa. Panahon nga seguro nga i-regulate ang pagbaligya og rugby kay mao kini ang giabusohan sa uban nga nakadanyos sa kaugmaon sa kabataan.

Labaw sa tanan ang mga ginikanan silotan sa ilang pagpasagad sa mga anak nga maglaroy laroy sa kadalanan.

Ang hugot nga tambayayong sa kapolisan ug ubang mga ahensiya sa kagamhanan seguro masolbad kining maong suliran kon masustiner lang.