80% ang ilang bakasyon
Walay rason si Senate President Chiz Escudero sa pagreklamo nga naapiki sila sa pagpasaka sa mga kongresista sa articles of impeachment batok ni Bise Presidente Sara Duterte sa kataposang adlaw sa ilang sesyon niadtong Pebrero 5.
Mahimo p nilang matukod ang impeachment court, manumpa isip senator-judges ug matakda ang mga lagda ug kalendaryo sa impeachment trial. Nga dili malapas ang ilang legislative calendar ug, labaw sa tanan, ang 1987 Constitution. Nga nagsugo nila pagsugod sa husay sa labing daling panahon (bisan dili angkunon ni Escudero nga mao nay kahulogan sa “forthwith”).
* * *
Ang legislative calendar nga nauyonan sa Senado ug House of Representatives nagtakda nga natapos ang ilang sesyon niadtong Pebrero 7, Biyernes (dili sa giinsistir ni Escudero nga Pebrero 5, Miyerkules).
Dihang gisumiter ni House Secretary General Reginald Velasco ang 44 ka pahina nga articles of impeachment dayong alas-5 sa hapon niadtong Pebrero 5, kalugwayan untang Escudero ang sesyon hangtod sa Huwebes, Pebrero 6, o Biyernes, Pebrero 7. Nga gihimo sa Senado sa nangaging katuigan pagpasar sa mga balaudnon.
* * *
Gawas pa, hayahay kaayong ilang legislative calendar: Mas daghan og bakasyon kay sa trabaho. Angay silang mauwaw sa pagpamugos sa upat ka buwan nga bakasyon kay sa importanteng trabaho nga eksklusibong gisangon sa konstitusyon nila.
Ubos sa kalendaryo nga gitakda sa concurrent resolution sa House ug Senado, tulo ka adlaw rang ilang sesyon sa kada semana nga wala magbakasyon: Lunes, Martes ug Miyerkules. Upat ka adlaw ang ilang pahuway: Huwebes, Biyernes, Sabado ug Domingo.
* * *
30 ka adlaw ang ilang sesyon human sa State of the Nation Address (SONA) sa Hulyo 22 hangtod sa Septiyembre 27, dayong bakasyon sa Kalagkalag sa niaging tuig. 21 ka adlaw ang sesyon sugod sa Nobyembre 4 hangtod sa Disyembre 20, dayong bakasyon sa Pasko ug Bag-ong Tuig. 12 ka adlaw ang sesyon sugod sa Enero 13 hangtod sa Pebrero 7, dayong bakasyon para sa kampanya ug eleksiyon karong tuiga. 6 ka adlaw rang sesyon inigbalik unya sa Hunyo 2 hangtod sa Hunyo 13 karong tuiga.
69 ka adlaw ra ang ilang sesyon. 20% sa 343 ka adlaw sa 3rd Regular Session. Sa ato pa, 274 ka adlaw (80%) ang ilang bakasyon.
* * *
- Latest
