EDITORYAL - Sugod na og panimalos?

Makaalarma kining balita nga nag-ingong nangabot na dinhi ang mga hired killers gikan sa Ozamis City nga sakop sa Parojinog Drug criminal gang nga ang tuyo mao ang paglikidar sa mga polis dinhi sa Sugbo.

Makaalarma tungod kay usa ka adlaw human nga gibutyag sa PRO-7 director Brigadier General Debold Sinas, usa ka polis ang gipunting diha mismo sa ilang balay ug napatay gyud ang maong tinugyanan sa balaod.        

Ang maong nakalas mao si SPO2 Mikie Espina nga nadestino na didto sa Masbate. Si Espina maoy usa sa mga labing inilang aktibo kaayo sa kampanya kontra kriminalidad sa dihang nadestino pa kini sa Dakbayan sa Talisay.

Apil sa mga operasyon nga aktibo kaayo kaniadto ang maong polis mao ang sa kampanya kontra ilegal nga drugas diha sa Talisay. Niadtong mga panahona, grabe pa kaayo kadako ang problema sa ilegal nga drugas sa maong dakbayan ilabi na sa Barangay Tanke.

Matud ni Sinas nga ang maong mga hired killers nga nangabot dinhi giingong gigamit sa mga drug lords aron panimaslan ang mga polis nga nakaligis kanila ug sa ilang negosyo. Tingali gibalikan si Espina sa iyang mga naligsan.

Sama sa ubang mga polis nga gipalagpot gikan sa Central Visayas, si Espina apil sa mga gipasanginlang nalambigit sa ilegal nga drugas, apan wala kini sukad mapasakahi og kaso bahin niini.

Sa nahitabo kang Espina, angay gyud mag-amping ang mga tinugyanan sa balaod dili lang panahon sa ilang trabaho kondili bisan sa ilaha mismong mga panimalay.

Si Espina usa lamang sa daghan nga mga polis nga gipamatay sa mga wala mailhing mga mamumuno sa nanglabay nga mga buwan.

Kadtong mga polis ug sakop sa ubang law enforcement units nga una nang nangamatay gipasanginlan sab nga nalambigit o konektado sa mga inilang druglords sa Sugbo.

Hangtud karon, wala pay natumbok nga mga responsable sa maong mga pagpatay.