Silot gidawat ra

Nakatilaw na gyud si Cebu City Mayor Nestor Archival og silot gikan sa Ombudsman tungod sa paghatag og pagtugot nga mapahigayon ang Night Market sa Colon Street bisan og wa pa makompleto ang mga dukomento.

Usa ka buwan nga sweldo, bali’g P230,000 ang gipahamtang nga multa kaniya, ug andam ra ang mayor nga mobayad sa multa kay nasabot man gyud niya nga nakahimo siya’g Simple Neglect of Duty.

Ang tinuod, kining paghimo og Night Market sa Colon Street kaniadto pa gyud ni, ug kinsa ra man tawon ko nga paminawon sa mga mayor, nga dili gyud maayo nga ang Colon sirad-an unya patindahan.

Nakahinabi ko og mga opisyal sa Department of Public Works and Highways (DPWH), ug wa sila malipay nga anha sa Colon Street, giila nga “oldest street in the Philippines” ang night market.

Ngano man? Sentro sa siyudad ang Colon Street ug daghang sakyanan ang anaa diha moagi, ug kon sirad-an kini kay patindahan alang sa Night Market, sakripisyo kaayo sa mga motorista.

Gawas pa, ang siyudad mideritso lang pagsirado sa Colon Street nga wa mananghid sa DPWH, nga mao man unta kini ang dunay katungod kay ang Colon Street usa man ka national road.

Maisip nga wa na lang gyud pamatasan ba. Dili ko supak sa pagpahigayon og Night Market, apan ayaw diha sa Colon Street. Kanang Legaspi Street gikan sa eskina Colon, paingon sa Cathedral.

Pwede sab ang Plaridel Street paingon sa Carbon Market, ug maayo kay ang mangumpra sa Carbon panahon sa gabii, makaanha pa sa Night Market. Ang tumong niini aron dili masirado ang main nga karsada.

Nakabasa ko og hukom sa Supreme Court sa usa ka kaso nga naglambigit og Local Government Unit didto sa kaulohan, suspenso gyud ang mayor kay matud sa labaw’ng hukmanan “Roads are beyond the commerce of man.”

Apan pwede ra lagi nga hatagan lang og “humanitarian consideration” nga patindahan ang karsada, apan ayaw lang ang main road. Sayonan ka nga alas singko pa lang sa hapon mahasol na ang trapiko kay manulod na ang daghang karomata nga gikargahan sa mga baligya paingon sa Colon?

Ang rason gud nga dili makabalibad ang mayor kay ang grupo nga nanghangyo nga anha gyud sa Colon ang Night Market daghan man og sakop, ug ang kahadlok nga dili na unya kini mosuporta kaniya sa eleksyon, maoy hinungdan.

Sa laing bahin, si kanhi Mayor Raymond Garcia gisilotan sab og unom ka buwan nga suspenso, pero multa na lang kay wa na man siya sa katungdanan.

Apan mi-file si Raymond og Motion for Reconsideration kay matud niya dunay wa kaayo masabti sa imbestigador nga mihupot sa kaso batok kaniya.