Gugma sa yutang natawhan

Sa katapusang update sa Kalayaan Atin Ito Movement niadtong December 16, adunay 88 ka youth volunteers nga gitakdang molarga padulong sa Pag-asa Island, sa lungsod sa Kalayaan, probinsya sa Palawan dungan sa paglurang sa bagyong Nona.

Sila ang mga youth volunteer nga giorganisar ni kanhi Marine Captain ug Oakwood mutineer Nicanor Faeldon. Moestar sila og usa ka buwan sa maong isla aron mapakita ngadto sa China ug sa ubang mga nasud nga nangangkon og teritoryo sa mga isla sa West Philippine Sea, nga ilang barugan ug suportahan ang pag-angkon sa Pilipinas nga maoy tinuod nga nanag-iya sa maong mga isla.

Samtang giila ug gipasalamatan sa gobiyerno sa Pilipinas ang kabayanihon sa kawsa sa maong mga batan-on, wala hingpit suportahi sa gobiyerno ang ilang lakang.

Sa pasiunang pahibawo sa KAI Movement sa niaging mga buwan dunay 10,000 ka batan-on tibuok nasud ang moapil sa kawsa. Apan sa nagkaduol na ang gitakdang panahon sa ilang paglawig, nalaslasan kini og 2,000 ka volunteers, ug sa katapusang ihap niadtong December 16, miabot na lang gyud og 88 ka volunteers ang nagtapok didto sa barangay Buenavista, sa Puerto Princesa City, Palawan nga naghuwat sa paglurang sa bagyong Nona.

Gibugnaw sa Malacañang, sa Armadong Kusog sa Pilipinas ug ilabi na sa mayor sa Kalayaan, Eugenio Bito-onon Jr. ang maong mga batan-on sa dili pag-adto sa isla tungod sa seguridad ug sa ilang kaluwasan. Ang lungsod sa Kalayaan diin nahimutang ang isla sa Pag-asa mao ang labing gamay nga lungsod sa tibuok nasud. Aduna lang kini 222 nga kinatibuk-ang populasyon sa census niadtong 2010. Usa kini ka 5th class municipality nga duna ray usa ka barangay ug P47 million nga annual budget. May gubaong airstrip ang lungsod, 5-bed lying-in clinic para sa mga manganak ug usa ka gamay nga elementary school. Kaniadto usa kini ka military installation. Gibuksan kini ngadto sa mga sibilyan niadto lang 2002.

Sa maong mga limitasyon kusganon nga nibalibad si Mayor Bito-onon sa paghangop sa mga batan-on. Dili siya makapasalig sa ilang seguridad ug kaluwasan sulod sa 30 ka adlaw sa isla. Gani matud ni Mayor Bito-onon bisan ang mga nabansay na  nga mga sundawo, molunga pa. Mas gikabalak-an niya ang panglawas sa mga batan-on, ilabi na kun dunay masakit. Apan bisan pa sa mga posibleng kalisdanan nga ilang masinati ug sa pahimangno sa gobiyerno kanila, wala magpapugong ang 88 ka volunteers. Gani pipila kanila graduating na unta ug nituyo lang gyud pag-undang sa ilang pag-eskwela aron mouban sa maong misyon.

Samtang dalaygon ang simbolismo sa gugma sa nasud nga gipakita sa maong mga batan-on, unta ilang nasabtan ug nakita nga dili sayon ug basta-basta abogon ang China o si bisan kinsa nga nangangkon og teritoryo sa West Philippine Sea.

Kun sa ilang pag-estar sulod sa 30 ka adlaw makatabang sila sa pagpalambo sa kinabuhi sa mga islahanon, kana maoy tinuod nga gugma sa nasud.