Na unsa na ang expressway?

Komusta na kaha ang kaugmaran sa Metro Cebu Expressway, ang usa sa mga  dakong proyekto nga pang-inprastraktura sa lalawigan sa Sugbo panahon sa administrasyon ni kanhi Presidente Rodrigo Duterte?

Dugay na ang mga Sugboanong nga wala makadungog sa update sukad nga naundang ang pagtrabaho niini. Ug dakong pangutana karon kon kanus-magpadayon ang konstruksiyon niini.

Ang labing ulahing kalamboan niining maong proyekto, nga magkonektar sa siyudad sa Naga ngadto sa dakbayan sa Danao, mao ang anunsiyo sa kagamhanan sa probinsiya sa Sugbo nga kini na ang modumala sa pagpadayon sa konstruksiyon niini.

Apan sukad niadto, wala na mikamang bisan usa ka dupa ang maong proyekto. Sa akong nakita, klaro nga kakulangon sa resources, ilabina sa pinansiyal nga pundo, ang rason ngano nga naunsiyami ang resumption niini.

Daghan ang nabalaka basin unya kon mahimong usa ka 'white elephant' ang Metro Cebu Expressway. Atong panid-an. Angay lamang unta kini ang hatagan og unang prayoridad tungod kay kini unya ang mamahimo nga pabilo alang sa dugang ekonomikanhong kalamboan sa Sugbo.

Kini sama unya sa pagtabang sa kampanya sa pagpahiyos sa nagkagrabe nga problema sa kahuot sa trapiko sa Metro Cebu. Kini tungod kay ma-divert na man unya ang ubang sakyanan nga padulong ngadto sa Northern Cebu.

Usa pa, dakong ekonomikanhong kalamboan ang dala sa rota unya sa Metro Cebu Expressway. Kini gumikan unya sa pagsulbong sa mga patigayon sa mga lugar sa kabukiran nga maagian niini.

Sayang kong magpabiling magyaka ug lumotan na lamang ang maong dakong proyekto. Angay hunahunaon sa lokal ug nasyonal nga mga kagamhanan ang dakong benepisyo nga dala unya niini. Mao nang angay kini nga himoong prayoridad.