EDITORYAL — Gustong mosikat, bahalag makahasol

Makadaghan ng dunay insidente nga gikalambigitan aning mga nangambisyong mahimong sikat nga vloggers ang gipasaylo lang bisan og nakahasol ug nakapurhisyo na sila sa publiko tungod sa ilang mga gipanghimo.

Ning bag-ohay lang, usa ka vlogger maoy nakaingon sa pagkabalda sa dagan sa trapiko sa lungsod sa Consolacion sa dihang kini nag costume og kuhol o taklong nga kolor green ug nagkamang-kamang sa tunga-tunga sa karsada.

Maayo nalang nga walay nagminalditong drayber, wala siya ligsi. Apan kining iyang drama-drama wala man tuod makasakit sa uban ug wala makaingon sa ilang pagka-disgrasya, nakamugna kini og problema sa trapiko.

Basin nagtuo siya nga dili siya pwedeng tiketan kay wala man siya mag-drayb adtong tungora, apan ang iyang gibuhat pwede gihapon kaayong moresulta sa pagkapriso kung tinud-on siya sa kapolisan o ba kaha sa kagamhanan sa Consolacion.

Ang iyang gibuhat matawag nga public scandal ug disturbance, pwede sab obstruction of traffic. Unsaon nalang kun dunay emerhensiya nga natanggong sab adtong tungora tungod sa traffic?

Unsa nalang og naay pasyenteng tabangonon nga gisakay og ambulansiya ug tungod sa pagkatanggong sa traffic nakabsan sa kinabuhi?

Karon, nisikat siya kay daghan man ni-bash ug nakatawa sa iyang gibuhat kay ni-react man sa iyang content nga maoy tumong ani? Unya ok ra diay ni mga taga Consolacion?

Wala na ba ni siyay laing nahunahunaang tarong nga content para sa iyang social media? Kung dili patagmon ang mga ingon niini, daghan pa unyang mosuon ani aron sab mosikat.

Kung ang mga hubog nga magkarambola diha sa mga imnanan pangkasohan gani og public scandal tungod sa kaguliyang nga ilang gibuhat, nganong dili man kini pwedeng buhaton batok aning mga makahasol sa publiko?