EDITORYAL — Police scalawags

Magsilbi unta nga leksyon sa mga sakop sa Philippine National Police kaning pag dismiss sa hapit duhag tunga ka batalyon nilang mga kauban tungod sa pagka badlungon.

Ning bag-o, gitaktak sa PNP. Ang 1,562 ka mga sakop gikan sa serbisyo tungod sa nagkalain-laing kasong administratiba ug kriminal.

Gawas ana nila, naay kapin 5,000 ka mga polis pud ang gipangpahamtangan og silot tungod sa mga kasong adminitratiba.

Ang mga kaso naglambigit sa mga kasong may kalabotan sa ilegal nga drugas, robbery, extortion ug uban oang mga linoog nga krimen,  mga opisyal pa gyud ang uban kanila.

Naay uban sad nga gipangtaktak sa serbisyo tungod sa pag AWOL, ang uban niabusar sa ilang pagka polis ug nanakit og mga tawo.

Gawas sa gipangtaktak, naay hapit tulo ka libo ka police officials nga gipangsuspenso ug hapit usa ka libo ang gi-reprimand ug hapit 300 ang gi demote ang ranggo.

Kaning aksyon nga gihimo sa liderato sa PNP kabahin sa ilang gipakusgang internal cleansing batok sa mga police scalawags.

Pagkaanugon sa ilang pila ka tuig nga kahago para lang gyud makasulod sa PNP. Nahimo silang organisado ug unipormadong mga kriminal tungod sa kahangol sa kwarta ug nabutahan sa gahum.

Giusikan nila ang kadako sa gibating garbo sa ilang mga pamilya pagkasayud nga nakasulod sila sa PNP, karun naputos sila sa pagtamay ug gikauwaw sa ilang mga kaila.

Himuon unta kining leksyon sa tanang nahibiling mga polis nga naa pa sa serbisyo,  kay dili lang sila o ang ilang kaugalingon ang mabutang sa kauwaw, kaguol, kalisdanan kondili apil pud ilang pamilya.

Dunay bug-at nga rason kun nganong “ To Serve and Protect” ang motto sa PNP.

Kinahanglang padayunon sa PNP ang paglimpyo sa ilang organisasyon.