Biyaya ng Diyos

Tayong mga tao’y maraming biyaya

na galing sa Diyos nating mapagpala;

araw-araw tayo’y mahal ng Bathala --

bagama’t maraming nagwawalanghiya!

Ang araw ang buwan laging sumisikat

na nangangalaga sa ibon at gubat;

ang bundok, ang ilog at dagat --

patuloy na dito’y nagpapaliwanag!

Sa bukid ang ating mga magsasaka

sa patak ng ulan sila’y masasaya;

kung wala ang tubig sila’y walang sigla

pagka’t ang pananim ay natutuyo na!

Ang araw sa lahat makapangyarihan

liwanag ang bigay sa lahat ng bayan;

sa kamay ng Diyos ang pinagmulan

kaya ang liwanag abot kahit saan!

Kung wala ang buwan wala ring pag-ibig

sa dalawang pusong sa pagsinta’y tigib;

wala ring bituing makislap sa langit

binata’t dalaga’y laging magkalapit!

Sa dagat naroon ang maraming isda

hindi nauubos hindi nawawala;

sa sungit ng bagyo na mamalakaya

isdang maliliit ay lumalaki pa!

Sa bundok at gubat ay maraming ibon

at mga pagkaing sa tao ay tulong;

may mga prutas du’n sa buwa’t panahon

nakukuha natin kahit pa ngayon!

Ang kamay ng Diyos laging nakalahad

doon nagmumula biyaya ng lahat;

kaya huwag tayo mawalan nang hangad

na siya’y talikdan sa anumang oras!