Ang kamahinungdanon sa eleksiyon

Sa demokrasya, daku kaayo’g kamahinungdanon ang eleksiyon. Sa mga nasud nga nagtamod pag-ayo sa pagka-kinahanglanon niini, gihimo kini nila’ng kasangkapan pagtarong sa pangagamhanan ug pagpalambo sa nasud.

Alang kanila, balaan kini nga katungod. Ug tungod kay balaan, makagaba’ kun yama-yamaan.

Niini’ng atong kahimtang karon, makaingon ba kita nga gigabaan ang atong nasud? Gigabaan ba ang katawhan gumikan sa atong pagbugalbugal sa eleksiyon?

Gigabaan ba kita gumikan sa pagbaligya sa mahal nato’ng katungod pagpili? Gigabaan ba kita tungod kay ang atong pagbotar gibase nato kinsa ang highest bidder ug kinsa ang labing popular?

Maayo unta kun sa umaabot nga bugno’ng lugaynon, dili na usab makahatag kanato’g laing higayon pagduladula sa kabalaan niining maong katungod pagpili.

Matag piniliay, kanunay kita’ng mangandoy og usa ka “clean and honest elections,” ug nga unta, maoy mogulang mananaug ang mga kandidato nga tiunay gayud nga moalagad sa lungsod, ug  kadtong dili matintal pagpangurakot.

Giingon dinhi, “elections should not deteriorate into popularity contests.”

Tinuod, dili unta nato himoon ang eleksiyon nga indigay kinsa ang ilado, kinsa ang adunay daghang campaign funds, kinsa ang adunay daghang tarpaulin ug mga advertisement sa radio, TV ug mantalaan.

Kay kun mao lang gihapon kini ang mahitabo sa 2016 elections, dili kita makapaabot sa dugay na nato’ng gihandom nga tingusbawan.

Imagine, mipili kita og mga magbabalaud nga igo lang mag-endorse og mga produkto, mga magbabalaud nga nahimo’ng chairman sa mga silent committees, mga magbabalaud nga nagpasinaw lang sa ilang mga lingkoranan sa kongreso, wala g’yud kapangamahan bisa’g usa na lang ka balaudnon.

Ingon kita niini ka iresponsable nga botante. Pasagad lang. Unsaon nato pag-uswag niini? Ingon man sa mga local officials, in some instances, dili nato ibasi sa qualification ug morality ang atong pagpili kanila.

Unsay resulta? Inefficiency ug corrupt nga matang sa panggobiyerno. Unsaon nato pag-uswag niini kun magpabilin kitang mapasagaron.

Si Noynoy mipahimangno “to choose candidates who can fight for the interest of the people (dili kay manapi lang), as we don’t need those who are only good at reading scripts, dancing or singing. “

Ug sa iyang bahin, si Romulo Makalintal, usa ka inila’ng election lawyer, nagkanayon: “We need new and fresh ideas from truly qualified leaders who could lead our country and our people to their much-deserved economic and political recovery.”

Tukma. Hagit kini kanato’ng tanan. Dili nato himoon ang umaabot nga eleksiyon nga usa ka circus, usa lang ka kalingawan, ug usa ka talagsaong higayon pagnegosyo.

Lungsod, magtinarong na ta uy!