Sagpa sa mga Filipino

Ma pro o anti-Duterte man, isip usa ka Filipino angayan pamalandongan nato nga ang pagtugyan sa atong kadugo ngadto sa langyaw nga institusyon, ang International Criminal Court kon ICC usa ka sagpa nasud. Subo palandungon nga naghimo niini mao mismo ang atong gobiyerno nga maoy nangunay sa pag facilitate gikan sa pag aresto hangtud na sa pagpasakay sa eroplano nga iya sa Republika sa Pilipinas ngadto sa The Hague sa The Netherlands.

Dili nalang ko mohisgot sa legalidad kay dili man ko abogado apan sa pagtan-aw isip usa ka yanong molupyo tataw kaayo nga wala na mahasubay sa legalidad kon dili usa ka maniubrang politika ang nahitabo. Gisakripisyo ang pagpanalipod sa atong sobereniya bugti sa pangkaugalingon nga interest sa mga nagpaluyo niini.

Kong tinuod man nga sad-an si kanhi Presidente Duterte sa halapad nga pagpamatay sa mga nalambigit sa illegal drugs, unta sa kaugalingon nga korte sa Pilipinas siya gitaral. Nag-function pa man ang atong judicial system ug anaa usay daghan nga pasilidad nga kapaslakan niya kong malutsan og warrant of arrest ug mabilanggo.

Segurado man gyud nga makakuha og mga basehan ang mga mo-prosecute sa kanhi presidente sa iyang mga kasong pagpatay ug segurado nga mahiadto kini sa hukmanan diin siya taralon hangtud makonbikto ug mapriso. Unsa man ang gikahadlokan sa gobierno ngadto gikinahanglan pa itugyan pa sa ICC?

Ma kanhi presidente man sa nasud o yanong Pilipino responsibilidad sa gobiyerno nga panalipdan kini ang iyang batakang katungod. Sama nalang sa usa ka OFW nga nahukman og kamatayon sa Indonesia, naluwas kini sa atong gobiyerno ug napapauli pa gani kini sa Pilipinas. Salikwaot kaayo nga si Duterte gilawog dayon sa ICC.

Bisan gipakita lang unta sa gobiyerno nato nga dili masayon sayon nga mosurrender ni bisan kinsang langyaw nga gustong moulipon sa Pilipinas. Nganong wala man mapatuman ang warrant of arrest nilang Vladimer Putin sa Russia ug Benyamin Netanyahu sa Israel? Tungod kay gipakita nila ang ilang kalig-on nga walay bisan kinsa nga foreign entity nga modektar nila.

Samotan nga bully-hon kita sa China kay nibahag naman gani ang ikog sa gobierno sa mando sa ICC ug Interpol, maong mosamot ka ubos ang pagtan-aw sa atong nasod tungod sa gipakita niining kahuyang.

Kong nakasala si Duterte, dinhi siya taralon, ug bilanggoon ipon sa mga convicted criminals nga nagdasok sa mga prisohan sa nasod. Lig-on man kaha ang alegasyon ug mga ebidensya nganong iadto pa man sa ICC? Dili kaha nga pulos kutob lang sa pulong ang pasangil ug dili makadulot sa kang Duterte?