Nasiyakoy’ng protesta ni Tomas

Wala tuyo-a, pasaylo-a ang buta nga miagi.

Mao kini ang kanunay’ng ipasangil sa mga tawo nga makasaghid o makasala og laing tawo nga wala tuyo-a.

Niining nahitabo karon sa mga balota sa dakbayan sa Sugbo nga gipaubos sa election protest batok ni Mayor Mikre Rama ug Bise Mayor Edgar Labella, maisip ba kining “wala tuyo-a sa buta.”

Ang City Treasurer’s Office nga maoy gitahasan paghipos sa mga balota human sa eskutinyo tapos ang eleksiyon niadtong Mayo 13, mibutang lamang sa 592 ka mga ballot boxes ilawom sa tent nga mga busloton. Niadtong miaging mga adlaw, ang dakbayan sa Sugbo nakasinati og mga pag-ulan-ulan hinungdan nga tungod sa pagbuawak sa tubig-ulan, nakasulod kini ngadto sa nahimutangan sa mga ballot boxes.

Tungod kay dili selyado ang mga ballot boxes, nakasulod ang tubig-ulan. Usa ka empleyado sa City Hall mitug-an sa mga sakop sa media nga aduna gyuy mga balota nga nangahumod sa tubig-ulan.

Si Kongresista Tomas Osmeña igo ra gyud intawon nga nangindahay nga wala mangabasa ang mga balota. Kini, bisan gi-report na sa media pinaagi sa gitug-an sa usa ka empleyado sa City Hall nga nakasulod ang tubig ulan sa ballot boxes ug nangabasa ang mga balota sa sulod niini.

Kapait palandungon nga tungod lang sa kadanghag, ang katungod sa nangapildeng kandidato nga silang Tomas ug Bise Mayor Joy Augustus Young na-siyakoy.

Pero, unsa man ang mahitabo kun pananglit dili ma-establisar ang “force majeure” (buhat sa kinaiyahan) ning hitaboa?

Angayan ba patubagon sa kampo ni Tomas ang City Treasurer’s Office nga maoy gitahasan sa pag-guwardiya niini mentras wala pa maresolbar ang protesta nga gisang-at nilang Tomas ug Young?

Paabuton ta kini.

* * *

Pero taym pa ra gud.

Pananglit gituyo ning pagpalutaw sa ulan ning mga balota, kinsa kaha ning trabahoa?

Kun pasanginlan si Mike, maka-ingon ang uban nga maayo na aron daog na lang, kalimtan na ang protesta ni Tomas kay ang mga ebidensiya naingon na og gold fish sa aquarium.

Kun pasanginlan si Tomas, maka-ingon ang uban nga maayo na kay aron ang mga supporters sa Type O mahatagan og rason nga dili na lang nang protesta kay kapoy na, kay ang ebidensiya gibisbisan sa kalikupan.

Pero, luoy ang mga tawo nga seryosong nagsunod sa resulta sa eleksiyon.

* * *

Kadtong mga kandidatong naghunahuna nga magpaliwat sa mga langaw pula’g-lubot, aduna na kamoy basehan human karong bag-o, ang Comelec en banc hingpit nang midesisyon sa kandidatura ni Konsehal Augustus “Jun” Pe Jr.

Ang Comelec en banc mi-deny sa motion for reconsideration ni Pe sa desisyon niining pagbasura sa Certificate of Candidacy (COC) niini sa south district tungod sa kalapasan sa “residency requirement” nga maoy gimbut-an sa balaod alang sa mokandidato sa usa ka distrito. Si Pe nga konsehal karon sa north district, mi-file og COC pagkakonsehal niadtong Mayo 13 alang sa pagka-konsehal gihapon, apan ning higayona sa south district na.

Nakadawat og daghang pagsaway si Pe.

Apan bisan sa mga saway tungod sa iyang kahakog sa gahum, matud pa nila, midayon gyud siya og dagan. Ang Team Rama mikuwestiyon sa iyang kandidatura didto sa Comelec tungod lagi sa ka-imposible makapuyo kini sa south district nga ning panahona tua siya magserbisyo sa north district isip konsehal.

Misukol si Pe bisan nasayod siyang imposibleng matunga iyang lawas nga moserbisyo sa south nga karon nag-serbisyo sa north. Apan dili pa buot nga modaog ang kahanggaw sa aplikasyon sa balaod. Gidesisyonan sa Comelec nga wala makapasar si Pe sa residency requirement.

Karon nga ang Comelec en banc mitingog na nga wala makapasar sa residency requirement si Pe, maayo unta nga dawaton na lang ni Pe ang desisyon.

Karong mga panahona maayong ipabati ni Pe ang salikwaot niyang sitwasyon. Karon, konsehal siya sa north district, ug pananglit nakadaog pa siya (maayo ra gyud og wala) isip konsehal sa south, unsa may status niya? Outgoing councilor sa north ug sa samang higayon, incoming councilor sa south?

Puwerteng ngilngiga ni Pe, apan dili ba salikwaot paminawon?

Maayo na lang karon nga wala siya makadaog sa south kay ang status ni Pe outgoing councilor sa north ug loser nga kandidato sa south, period.

 Ang pangutana kun makonsensiya ba si Pe niining sitwasyona. Sa umaabot, dili na lang unta siya magpabaga.