Nauwaw ko!

Ginaingon nga sa kadaghan sa itlog, duna g’yuy higayon nga may pipila niini binugok.

Mao kini ang nahitabo sa Task Force Alpha (TFA), usa ka grupo nga gi-accredit sa Land Transportation Office (LTO) nga motabang sa pagdakop sa mga masalaypong drayber.

Nasubo kaayo ko pagkasayud, nga usa ka bag-o namo nga kauban sa TFA nadakpan sa akto nga giingong nangilkil unta sa iyang dinakpan. Angkonon nako nga nauwaw g’yud kaayo ko kay gipagarbo gud nako ang among grupo.

Upat na ka tuig ko nga nahimong deputized agent sa LTO ug makadaghan na nga dunay mga drayber nga akong nadakpan nga misuway og suborno nako aron dili sakmiton ang iyang lisensya.

Garbo ko nga sa kapin sa upat ka tuig na nako nga pagka deputized agent sa LTO wala g’yud ko magpatintal sa mga suborno kay pagsulod nako sa TFA ang tumong nako mao nga bangonon ang katumbahon nga dungog sa mga road law enforcers.

Walay mga draybers nga makatulisok nako nga midawat ko’g suborno ug nga misuway ko’g pangwarta kanila. Mao kini ang rason nga nasubo kaayo ko pagkasayud nga si Engilbert Caumeran, gidakup kay kuno nangwarta.

Akong giingnan ang among mga opisyal sa grupo nga dili tabangan si Caumeran kay nagpakauwaw siya sa grupo nga sa kapin sa napulo ka tuig na, girespitohan sa mga drayber. Sa ngalan sa TFA, mangayo ko’g pasaylo sa publiko nga kadto nahitabo.

Ingon g’yud tingali niana, sama nga ang kapolisan ug ang ubang mga organisasyon, duna man g’yuy mga badlongon. Tuguti lang ko nga mopasabut nga ang gihimo ni Caumeran, iya-iya ra kadto kay wala kami maghimo og checkpoint operation niadtong Nobiyembre 3.

Ikaduha, kanunay kami nga nagpahimangno sa among mga sakop nga ang lisensya human sakmita, isyuhan g’yud ang drayber og Temporary Operators Permit, ug ang lisensya itugyan dayon sa LTO inigka-ugma, gawas lang kun Sabado o Domingo, ingon man mga holidays.

Dasigon nako ang publiko nga kun dunay mangwarta kaninyo nga mga traffic enforcers, bisan polis ug ubang enforcers, duol kamo sa kapolisan aron sila madakpan kay kun sila magpadayon sa ilang binuang, makadaut ra sila sa dungog sa mga nagtinarung.

Angkonon nako nga usahay mauwaw ko nga mobarug diha sa karsada tungod sa gihimo sa ubang mga traffic enforcers nga kurakut kaayo. Ang mga drayber gud magtoo man nga ingon na lang g’yud niini ang tanang mananakop.

Sama adtong usa ka “Balikbayan” mitunol nako og P1,000. Akong gipakita ang uban nako nga identification cards. Nangayo siya og pasaylo. Giingnan ko niya nga “sorry” kay nakadungog man gud siya nga kun madakpan diri sa Pilipinas tunolan ra. Diha-diha ako g’yud nga gisakmit ang iyang lisensya.