Ang depensa sa lawas

Kitang tanan nasayud nga mahinungdanon kaayo ang pagdepensa sa atong lawas. Mao man gani, aduna kitay nagkalainlaing paagi. Sama anang maglakaw ta nga mosuroy sa kagabhion, magluklok gyud tag kutsilyo o kaha bisa’g unsa nga hinagibang ikasukol kun may di damhon nga panghitabo sama sa paregla. Ang uban gani nga isog o talawan, mangandak mamahala lang sa abilidad nila o kaha ang bugtong depensa nila, mao ang pagdagan na lang kaysa madisgrasya.

Sa ato pa, kun kini ang mga paagi nga atong nakat-onan, mawad-an lang gihapon og kapuslanan. Dili kita makaseguro niini nga madepensahan ang atong lawas. Magkalisod maunay pa kita nga malandig sa prisohan, ospital o kaha sa sementeryo, tungod sa armas nga depensa unta sa lawas. Tungod kay duna tay nataligam-an nga mas kinamaayohan nga paagi nga mao ang lawas nato mismo.

Ang lawas nato mismo adunay natural body defense nga mao ang IMMUNE SYSTEM. Kini maoy angay natong permi andamon nga kanunay palig-onon. Kun ang utok magluya sigurado maapektahan nga magluya pod ang lawas. Aron molig-on ang lawas palig-ona ang atong immune system. Unsaon man? Hatagi’g sustansya ang utok ug lawas pinaagi sa balanseng pagkaon sama sa mga utanon ug prutas. Likaye kaonon kanang may preservatives, sobrang asin, asukar ug mantika. Igong ehersisyo bisag 30 mins. maglakawlakaw. Pabuwad kadyot sa init sa sayong buntag ug sa dayong igkasawop sa adlaw. Palapdi ang panghunahuna. Positibo sa kinabuhi. Katawa sa problema. Makighinabi sa isigkatawo. Ipamahin ang katakos, kapasidad ug mga tinubdan sa kahigayonan nga naangkon mo.

Kun kini ang atong lifestyle, dili gyud ta madutlan sa kaluyahon o sakit. Ang natural nga paglihok o disiplina ug ang pagkaon sa mga natural nga paagi mao kana ang paagi nga ginganla’g naturotherapy. Aduna nay daghan nakat-on ug mga experto na niani nga matang sa pagpalig-on sa lawas aron makab-ot ang malungtaron ug tinuoray nga kahimsog sa emosyon, sa pisikal ug sa pangisip.

Busa, mas maayo nga sa sayong bahin sa atong kinabuhi, atimanon pag-ayo nga himoong prayoridad ang pagpalig-on sa hingpit ..ang pagdepensa sa lawas nga magamit sa hilabihang pakigbisog alang sa kaugmaon nga malipayon.