EDITORYAL - P400 milyones makaayo sa first district

Tinuod mogaan-gaan ang gastuonon sa pagpalapad sa karsada sa unang distrito gikan sa dakbayan sa Naga hangtud Carcar gumikan sa P400 milyones   nga giamot ni Kongresista Tomas Osmeña.

Gipakita lamang sa kongresista sa south district sa Cebu City ang iyang kaayo sa iyang mga silingan.

Kini tungod malagmit kay wa na magkinahanglan niini ang iyang distrito sa Cebu City.

Malagmit buhong na kaayo ang taga Cebu City sa daghan niyang hinabang ug gibubo nga proyekto mao tingale nga tua niya ipunting ang iyang ubang kaayo sa mga lugar nga di sakop sa iyang distrito nga girepresentahan ngadto sa Kongreso.

Apan ambot daghan bayang nangutana  kun wa bay gikahiubsan si Tommy sa taga south district sa dakbayan sa Sugbo kay mura man og iya kining gilihayan pag-ayo.

Kay nasud-ong sa taga Cebu City nga sa mga eskuwater nga gipapuyo makadiyot ni Mayor Rama sa north reclamation area, unya gipaputlan niya og koneksyon sa tubig ug suga aron mamalhin ngadto sa ilang relocation site, gilabanan baya ni Tommy   bisan di sakop sa iyang distrito.

Iyang gipaestalaran og balik sa suga ug tubig aron mapermanente na ang  pagpuyo sa maong mga eskuwater sa mahalon kaayong yuta sa siyudad. Maayo gani kay si Mike nag-aso-aso ang political will, aw napapahawa gyud pagpugos ang maong mga eskuwater gikan sa maong lugar.

Ambot kaha kun ang maong kuwarta nga alang unta sa flyover sa Cebu City kun gigasto pa lang   sa pagpaayo sa mga imburnal ning siyudad aron nga di makahuygo ang baha inig bundak sa uwan kamalipayon kaha sa mga molupyo sa Cebu City no.

Apan di man tingale gud gusto si Tommy  nga daygon siya sa taga Cebu City ug maoy hinungdan nga iyang gihikaw ang maong kuwarta ngadto kanila.

Ang nakalisud lang kun may mga taga Cebu City nga nahiubos ning iyang gibuhat ug dad-on ang maong kahiubos hangtud sa adlaw sa election, di kaha sila adto mopahungaw sa maong kahiubos sa mga balota?