Pagtarong sa MVIC

Dihang gitanyagan nga mamahimong bag-ong tagduma sa Motor Vehicle Inspection Center (MVIC), si Assistant Regional Director Arnel Tancinco sa Land Transportation Office Central Visayas (LTO 7) napuno sa panagana:

• May kahigayonan pa bang malimpiyo ang usa sa labing nangalisbo nga mga buhatan sa gobyerno, nga mas nadungog sa panguwarta kay sa pagsusi sa roadworthiness sa mga sakyanang pribado, pamasahero ug sa gobyerno?;

• Unsa may mahitabo niya kun apikihon sa iyang mga maligsan nga may gamhanang mga koneksiyon?; ug

• Unsaon man niya pagkuha ang suporta sa publiko nga maoy labing mahinungdanon aron malimpiyo ang industriya sa transportasyon?

* * *

Nipatigbabaw ang determinasyon ni Tancinco pagtabang sa kampanya sa pamunoan ni Presidente Noynoy Aquino paglimpiyo sa burukrasya. Gidawat niya ang tanyag. Pormal nga niasumir si Tancinco sa iyang bag-ong katungdanan niadtong Lunes.

Ug natinuod ang kasagaran sa iyang kahadlok. Labihan gyud diay’ng hugawa sa MVIC. Gitugotan nga malab-as ang rehistrasyon sa mga sakyanan bisan wa masusi basta makabayad sa pipila ka opisyal sa MVIC. Bisan ang iyang kaubanang kawani nisuway na paglipatlipat niya. Hapit tanang public utility jeepneys (PUJs) nahagbong sa screening. Ug may gamhanang mga politiko ug dagkong mga negosyante nga nagsugod na pagtiyabaw sa iyang ka-istrikto.

* * *

Laing binuang ang nadiskubrehan ni Tancinco: Ang computer system ug ubang kahimanan sa MVIC di na kapuslan. Gani, nahugno siya pagkahibawo nga wa gyud kapusli ang kahimanan, nga labihan untang modernoha pagsugod sa MVIC, kay depektoso nang daan. Gipatun-an na niya kun mahimo pa bang ipaayo o mamalit na lang og bag-ong kahimanan.

Maong napugos ang MVIC pagdangop sa visual inspection sa mga sakyanan. Nga gawas nga di hingpit nga kasaligan, giangkon ni Tancinco, mahimo pa gyong tinubdan sa panguwarta. Salamat sa iyang pagtungkawo matag adlaw sa tibuok semana sa niaging semana, wa na kalusot sa MVIC ang kagangkagang ug morang-panghaw-og-tambutso nga mga sakyanan.

* * *

Nakaginhawa og luag si Tancinco pagkahibawo nga way sukaranan ang lain niyang kahadlok: Nga di kaato ang MVIC pagsusi sa tanang sakyanan ug busa mahimong mapugos pagpaluag sa ilang mga lagda. Matud niya makasusi sila og hangtod 100 ka sakyanan matag adlaw. Nangita hinuon sila og alternatibong dapit alang sa buses ug ubang dagkong sakyanan nga di mapaigo sa ilang compound sa Dakbayan sa Mandaue. Padayon pang gitun-an ang plano ni kanhi Transportation secretary Mar Roxas nga i-deputize sa MVIC ang pipila ka gasoline stations.

Nagkinahanglan si Tancinco sa atong suporta aron nga molampos sa lisod nga tahas pagtarong sa MVIC. Nagkinahanglan ta og dugang opisyal sa gobyerno nga sama niya kaligdong ug katakos. Hinaot nga ang atong mga pangaliya makapalig-on sa iyang lutahan batok sa mas dagkong mga kalyo nga iyang matumban.

* * *

 Email: [email protected]