Pakpak kang Arleigh Sitoy

Nagsugod na ang pag-utingkay sa gahum sa buhatan ni Gob. Gwendolyn Garcia batok sa gahum sa Provincial Board.

Dugay na kaayo kining isyu, apan usa lamang ka maisog nga Cordovahanon ang nakahimo pagkuwestiyon sa naghinobrang abuso sa executive branch sa Kapitolyo, ilabi na ang kuwestiyon paggamit sa pundo alang sa mga sakop sa Provincial Board ug ang pag-hire ug pagsuweldo sa mga kawani alang sa mga bokal ug sa bise gobernador. Human sa privilege speech ni Bokal Arleigh Sitoy, daghang bokal ang mibarog pagsuporta sa iyang kawsa pag-review sa pundo sa kagamhanan sa lalawigan sa Sugbo nga gigasto sa buhatan ni Gob. Garcia. 

Kaniadtong si Arleigh pa ang Liberal sa provincial board, wala gyuy nakahisgot ug mitandog sa walay puas nga gasto sa Office of the Governor, gawas sa namatay’ng si Bise Gob. Greg Sanchez.

Apan karon nga namali na ngadto sa partido Liberal ang pipila sa mga bokal, apil na si Bise Gob. Agnes Magpale, mura’g maklaroklaro na ang kadaghanan nga mahimo na diay nilang sungagon si Gob. Gwen Garcia.

Karon nga nabati na ni Gwen ang dakong bul-og sa mga bokal nga mopaingon pagkuwestion sa iyang pagkagastoso, unsa kahay iyang buhaton? Unsa kahay iyang sangpotan?

Maayo usab segurong apilon nila sa paghisgot kanang Conditional Cash Transfer (CCT) program ni Pres. Noynoy Aquino nga ang distribution didto sa kalungsoran buot ipaagi sa CFI Cooperative unya matag benepisyaryo obligahon nila pagbayad og P50 isip processing fee ngadto sa maong kooperatiba. Mga pobre pa, panguwartahon pa gyud sa CFI kang kansang chairwoman mao ang inahan ni Gob. Gwen nga si kanhi Judge Esperanza Garcia.

Dili ko magtuo nga makapangisog si Sitoy sa ingon. Nakaila kaayo ko niining tawhana tungod kay pirme kaming magkatupad og lingkoranan didto sa University of Cebu sa among mga review sa wala pa ang Bar Exam. Apan hilomon ra man kaayo kini si Sitoy.

Nahinumdom pa kaayo ko usa ka adlaw niana sa dihang nag-law review kami sa University of San Jose – Recoletos, misulod si Sitoy nga nagsangkiig na human mabiktima sa paralisis. Apan nakuha pa gyud niyang magkomedya kanako pinaagi sa pag-ingon: “Unsa man bay, gitagaan lang nako sila’g usa kamot, nidaog pa gyud ko!”

Nagpakita lang kadto nga bisan sa iyang kahimtang, naninguha si Sitoy nga makadaog isip bokal aron makaserbisyo sa mga taga-siksto distrito bisan sa iyang kahimtang.

Sa iya hinuon gihimo karon nga mi-privilege speech pagkuwestiyon sa budget spending sa gobernadora, daghan ang mipakpak kaniya. Kay sa tanang bokal, siya lang usa ang adunay itlog nga mosungag sa gobernadora kinsa nailhan nga isog ug kusog mangasaba.