Kinutoban sa dinastiya

Ang mosunod mao ang gidamgo sa mga Garcia nga mahitabo sa piniliay sa Mayo sunod tuig:

• Modaog si Gobernador Gwen Garcia pagka senador ug makahimo na sab og kasaysayan isip labing unang babayeng Sugbuanong sakop sa Senado;

• Modaog si Kongresista Pablo John Garcia pagka gobernador ug malugwayan pa ang 18 ka tuig na nilang pagduma sa Kapitolyo;

• Masublian silang Kongresista Pablo Garcia sa ikaduhang distrito ug Mayor Nelson Garcia sa Dumanjug;

• Mapili pagka mayor si Bise Mayor Marlon Garcia sa Barili; ug

• Mailog ni Mayor Duke Frasco ang liderato sa ikalimang distrito gikan sa mga Durano.

* * *

Apan sukwahi ang panglantaw ni kanhi senador Sonny Osmeña. Human sa makapahibung niyang saad pagpaluyo sa kandidatura ni Gwen sa Senado ug pagsalikway sa kandidato sa Liberal Party (LP) pagka gobernador, gidasonan na ni Osmeña ang mga pasidaan sa ubang mga haligi sa oposisyon sa Sugbo nga mapapha ang tanang Garcia sa 2013:

• Mapilde si Gwen kun mohinayon pagdagan pagka senador ubos sa United Nationalist Alliance (UNA) nilang Bise Presidente Jejomar Binay ug kanhi presidente Joseph Estrada;

• Mapilde si Pablo John ni kanhi Cebu City councilor Jun-Jun Davide pagka gobernador; ug

• Mapilde silang Noy Pabling sa ikaduhang distrito, si Nelson sa Dumanjug, si Marlon sa Barili ug si Duke sa Liloan o sa ikalimang distrito.

* * *

Paluyohan ni Osmeña sa ikaduhang distrito si kanhi kongresista Sim Kintanar. Apan gihulagway nga mas lig-ong kaatbang ni Noy Pabling si Provincial Board Member Wilfredo Caminero, kinsa uban ni Mayor Edsel Galeos sa Argao nanumpa na sa LP sa niaging semana. Kusganon hinuong niprotesta batok ni Caminero ang orihinal nga mga sakop sa LP, nga nipaluyo ni Dr. Cora Lou Kintanar, sa niaging piniliay.

Gihulagway sang mameligro ang pagpapili pag-usab ni Nelson sa Dumanjug kun mohinayon paghagit niya si kanhi mayor Cesar Baricuatro; ingon man ang gitakdang paghagit ni Marlon sa pagpapili pag-usab ni Mayor Teresito Mariñas pagka mayor sa silingang lungsod sa Barili.

* * *

Ang pagbiya sa mga Durano ug sa mayoriya sa mga mayor sa kampo sa mga Garcia maoy labing klarong timaan sa kangitngit sa kahigayonan nga kalugwayan pang ilang pagdominar sa politika sa Sugbo. Mga sakop sa One Cebu niangkon nga samtang si Noy Pabling ang labing takos nga makaatbang ni Davide may sukaranan ang mga kabalaka sa iyang kahimsog.

Samang mga sakop niingon nga ang nahibiling alas sa mga Garcia mao ang pagdagan ni Gwen pagka bise gobernador ug pagkontrolar sa provincial board aron pag-inutil sa pamunoan ni Davide sa Kapitolyo. Apan mahimo lang ning Gwen kun iyang mapilde si Bise Gobernador Agnes Magpale. Nga, alang sa mga nakaila nilang duha, mas lisod nga mahitabo kay sa iyang pagtaak sa Senado.

* * *

Email: [email protected]