Editorial - Ang SSS sa driver/operator ug vendor

Ang Social Security System (SSS) usa ka matang sa paseguro nga iya sa goberno alang sa tanang Filipino. Mas arang-arang og dyutay ang mga empleyado sa pribadong mga buhatan tungod kay moabaga man sa katunga sa bayranan sa ilang binuwan nga premium ang tagdumala sa gitrabahoan nilang buhatan o kompaniya. Ang walay mga amo nga matawag nga self-employed magpas-an sa kaugalingon nilang bayranan sa premium, matag buwan. Apan ang nakaayo lang kay sa pag-abot sa panahon ikaw ra man gihapon ang makapahimus niini.

Sama niining gitanyag karon sa SSS nga programa alang sa mga driver ug operator sa traysikol, vendor ug uban pa. Diin sa matag terminal o kaha merkado nga sagad duol ra kaayo sa mga vendor ug mga drayber sa traysikol ug operator, butangan sa kahon nga sama sa alakansiya diin adto ihug nila ang ilang inadlaw-adlaw nga premium matag adlaw. Kini aron sa paghatag kanila og kasayon nga imbis sa balay nila tigoma ang ilang ibayad sa premium matag buwan, ang ila na mismong kapunongan o asosasyon maoy maghiusa sa paghipos niini aron masiguro nga matag buwan may ikabayad ang matag usa kanila sa ilang premium. Ang kagaan sa bayranan nga tag-P10 matag adlaw labing mosayon kun imbis ang igpapalit og sigarilyo sa hinigarilyong drayber ihagbong na lang sa iyang alakansiya , nga alang sa iyang kaugmaon. Kun inig-abot niya og 60 anyos baskog pa siya, makapahimus siya sa ihatag sa SSS nga pension alang kaniya.

Kun ugaling di makaabot sa maong edad ang iyang kinabuhi, ang iyang asawa ug mga anak maoy modawat sa iyang pension.

Kumo kay may ikaabag man sa panginabuhi sa iyang biyuda bisan wala na siya, aw di makahunahuna dayon og minyo si Mrs, bahala na og magpunay lang og tikongkong nga mag-inusara uban ang kamingaw sa panahon sa kagabhion.

Kay sa wa kay pension nga ikabilin kang Mrs. diin dali kaayo kining makapangita og reserba buwahan to may makasalbar sa panginahanglan niya ug sa imong mga anak nga imong gibiyaan.