Ukay-ukay

Dugay na nga gidili ang importation ug pagbaligya og ukay-ukay dinhi sa nasud.

Kini pinasubay sa gimbut-an sa Republic Act 4653 nga napasar niadto pang 1966. Apan taliwa sa maong balaud milipang og maayo ang industriya sa ukay-ukay dinhi sa Pilipinas.

Pananglitan dinhi sa Sugbo, ang labing karaang dalan sa Pilipinas nga mao ang Colon hapit tanang tindahan nga naglumbay niini pulos ukay-ukayan.

Daghan nga mga gagmay'ng tindaran og RTW kaniadto napugos pagpanarangka tungod kay ang mga konsumidor mas mopili sa ukay-ukay tungod kay gawas nga mas barato, branded pa ang mga baligya.

Kinahanglan lang hinuon ang kakugi pagsugkay sa nagtipun-og nga mga baligya aron makapili sa maayong klase.

Sagad gud sa mga produkto nga gibaligya diha sa mga ukay-ukayan mga biya nga produkto, sa laktud basura sa mga first world countries sama sa Amerika ug Japan.

Pipila sa mga hinungdan nganong nanguhong ang mga tindihan og ukay-ukay taliwa sa pagdili niini sa balaud mao ang una: Kurapsiyon sa atong gobyerno.

Haguka ang mga Local Government Units pagpatuman sa balaud tungod kay sagad nila posibling nagdawat og suborno gikan sa mga nalambigit sa ilegal nga matang sa negosyo.

Ikaduha, posibling ignorante sila ug wala masayod nga kini ilegal. Pananglitan si Konsehal Alvin Dizon nangamahan og resolution ug gisuportahan sab sa mayoriya sa iyang mga kauban sa konseho nga nag-awhag sa Department of Trade and Industry nga hugot nga bantayan niini ang pagpatuman sa price tag law diha sa mga tindahan og ukay-ukay.

Kini tungod kay ila kunong namatikdan nga way klaro nga presyo ang mga baligya sa ukay-ukay.

Ang gihimo ni Dizon ug sa iyang mga kauban sa konseho nagpakita sa ilang ka ignorante sa balaud. Dili kaha inay nga awhagon ang DTI pagpatuman sa price tag, ilang awhagon ang buhatan sa mayor nga pasirad-an ang mga tindahan og ukay-ukay ug dili hatagan og business permit.

Simple lang ang prinsipyo sa paghimo niini. Kini tungod kay dili mamahimong i-regulate sa gobyerno ang usa ka butang nga ilegal.

Ang angayan tingaling buhaton ni Dizon mao ang pagsusi nganong nahatagan og business permit sa dakbayan, kun duna man, kining daghang tindahan sa ukay-ukay dinhi sa Sugbo.

Ug ikatulo, kakuwang sa kahadlok sa mga negosyante sa balaud tungod sa gamay lang kaayo nga silot niini.

Basi sa RA 4653 si bisan kinsa nga masakpang milapas niini duna lay multa nga di moubos sa P200 ug di molapas sa P20,000 ug pagkabilanggo gikan sa duha ngadto sa lima ka tuig.

* * *

[email protected]