Hapit mahulog sa sapa

Gidayeg gayud nako ang amahan ug anak nga sila si kanhi Kongresista Raul del Mar ug Kongresista Rachel “Cutie” Del Mar kay dili gayud sila makamao nga mangaway sa ilang kontra sa politika.

Gikuhaan nako og pamahayag si Raul sa pag-uban na ni Movie Talent manager Annabelle Rama-Gutierrez sa “handshaking activities” sa mga umaabot nga kandidato nga sakop sa Team Rama.

Abi ninyo og unsay gitubag ni Raul nako? Igo lang kini nga miingon nga “Thank for the info friend.” Akong giteksan og balik nga magkinahanglan ko sa iyang reaksyon kay kinahanglan man kini namong mga reporters.

Mi-reply dayon si Raul nako. “Thanks for the info friend” mao na’y akong reaksyon. Nakapanglingo-lingo ko uy samtang wala ko kapugong sa pagngisi. Nakaingon ko nga pagkabuotan gayud intawon aning Raul.

Sukad pa kaniadto nga kalma ra gayud siya. Sa pulong-pulong niadtong miaging gabii didto sa Tejero, si Cutie igo lang nangutana sa mga nanambong kun nakadungog ba sila nga nangaway ang mga Del Mar? “Nakadungog ba kamo nga nangaway ang mga Del Mar og kauban?” nangutana si Cutie. Kadto hinoon, masabut kaayo nga gipahinumdoman ra ni Cutie ang katawhan nga si Annabelle Rama kusug mangaway og kauban. Dili ba? He! He! He! Bugoy sab ni’g gamay ang akong “agaw” nga si Cutie da.

* * *

Bitaw, duha ka adlaw human si Annabelle miuban sa Team Rama sa pagpanglamano sa katawhan sa Lahug, kagahapon pormal na niya nga gipahibalo sa publiko pinaagi sa iyang Twitter Account nga wala nay makapugong pa kaniya sa paglansar pagka kongresista.

Nindot kun modagan si Annabelle kay ang tinuod, wala g’yuy lami ang politika kun ang kaatbang nga kandidato sa usa ka politiko klaro kaayo nga pildehonon. Kinahanglan gayud nga motinuod si Annabelle sa pagpangampanya kay dili ikalimod nga hilabihan kagamhanan ang mga Del Mar.

Mao bitaw kini ang rason nga mora’g wala lang gayud sila mabalaka nga si Annabelle gusto nga moatbang kanila.

* * *

Nagngisi ko nga nagbasa sa Twitter Account ni Annabelle. Iyang gisaysay nga kaniadtong Huwebes, alas 4:30 sa kaadlawon nagmata na siya aron mangandam pag-adto sa Lahug alang sa ilang handshaking activity. Kay wala man kuno siya makasul-ob og rubber shoes, pwerteng kapoya kuno nga misugod sila’g lakaw mga alas 6 sa buntag ug nahuman mga alas 10 na. Mora’g mitikig kuno ang mga tudlo sa iyang tiil.

Pastilan, dili pa kana mao Ma’am. Sa kampanya na g’yud maoy pait kay molakaw ka nga ngitngit unya dinali-dali ang pagbalhin-balhin gikan sa usa ka dapit ngadto sa laing lugar nga pahigayonan sa pulong-pulong. Ang nakapakatawa nako mao ang pagsaysay ni Annabelle nga diriyot siya madakin-as sa bakilid nga bahin sa Lahug. Kun wala pa lagi kuno siya mag-inabtik, adto siya punita sa ubos sa sapa. He! He! He!

Kun nahulog pa’s Annabelle paminaw ko, dili na gayud siya modayon sa pagdagan sa pagka kongresista.

* * *

Taud-taud na ko nga wala na mouban sa checkpoint operations sa LTO-Task Force Alpha kay busy kaayo sa trabaho nako sa pagka media.

Gusto na gani unta ko nga moundang, apan ang pagdagsang sa mga badlongong motorista maoy magpugong nako nga dili modayon sa akong plano. Ang makapasuko nako mao kadtong mga motorista nga tuyoon pagtaptap ang ilang plate numbers ug ang mga motorsiklo nga ang plate numbers anaa sa kilid o kaha tua sa ilawom sa tapaludo gipasok.