Pareho ra mo

Usa ka higala nako ang nagdesisyon nga magpa-ligate. Apan di’ sama sa ubang pamilya nga daghan og anak, duha lang ang iyang anak apan alang niya nipatigbabaw ang praktikal nga desisyon tungod sa kamahal sa pagpadako sa mga anak, pagpatungha ug ang pagsigurong hapsay ug masigurong maayo ang kaugmaon sa iyang duha ka anak. Adunay katakos sa pagbuhi sa ilang mga anak ang maong pamilya ug mahimo pa nilang mapun-an ang ilang mga anak apan nagdisedir ang akong higala nga magpa-ligate. Ang tanan natong lakang sa kinabuhi, magdepende sa personal natong desisyon ug pagtuo. Di’ sa unsay gidiktar sa ubang tawo ug gitu’d sa ubang institusyon.

Niadtong Sabado, nag-prayer rally ang katolikong simbahan batok sa labing kontrobersyal nga balaudnon—nga adunay kalabutan sa pagpagamay sa atong populasyon. Gikan sa kapin 80 milyones sa miaging napu ka tuig, karon niabot na sa halos 100 milyones ka mga Pilipino na ang nagpuyo sa nasud. Kung basehan ang desisyon sa gobyerno, buot lang ining masolusyonan ang grabeng kakabus sa atong nasud nga nabati sa kinabag-an sa mga tawo. Apan alang sa simbahang katoliko, di’ ang niburot nga populasyon ang problema apan ang grabeng kurapsyon nga nahitabo sa gobyerno.   Matod sa mga pari, kung gipaabot pa lang sa mga tawo ang maong salapi ug wa’ gibulsa sa mga kiriwan nga mga tawo, di’ unta problema ang kakabus karon.

Alang nako, mas maayong pakungon ang simbahan ug ang gobyerno sa isyu sa populasyon. Kung tan-awon ang China ug India, di’ ang populasyon ang ilang gipasanginlan sa ilang kahimtang inay nahimo pa nilang puhonan ug gahum sa kalambuan ang ka dako sa ilang populasyon.   Kung ang populasyon ang hinungdan, unsay gihimo sa maong mga nasud aron nga ilang magamit ang mga tawo sa paglambo sa ilang ekonomiya? Kini ang butang nga angayan tutokan sa gobyerno ug di’ ang pagpasar sa balaudnon nga Reproductive Health. Daghan ang nagduda ug usa nako, nga gihingusgan ning tanan sa gobyerno ug mga magbabalaod tungod sa pundo ug pabor gikan sa international community.   Human sa pagpasar sa maong balaud, nakatag-an ka, dakong pundo ang madawat sa gobyerno aron magamit sa pagpamalit sa mga gamit sama sa condom, pills ug uban pang gamit aron kapugngan ang pagpanganak.

Apan kung may sayop ang gobyerno, aduna say sayop ang simbahan. Ang kanunay nga pag-apil sa maong isyu sa sermon, katungod na sa simbahan. Apan ang pagkondinar sa mga tawo nga nipaluyo ug nipabor sa maong balaudnon, usa ka dakong hipokrito nga lakang sa simbahan. Nabalaka ang simbahan nga iduso ug ipugos sa gobyerno ang pagpagamit sa family planning pinaagi sa reproductive health apan di’ ba pagpugos ‘sab sa mga tawo ang gihimo sa simbahan nga di’ suportahan ang maong balaudnon ug ikondinar ang mga magbabalaod nga nagpaluyo ini?

Gihimo lang sa gobyerno ang tukma alang sa iyang mga tawo. Ug kung mahitabo nga mahimong balaud ang reproductive health bill, usa lang ka butang ang himuon sa simbahan--- ang paghingusog sa pagsangyaw sa ebanghilyo ug mga lagda sa kahitas-an nga motuhop sa huna-huna sa mga tawo. Kung moabot ang panahon, nanghinaot ‘ta nga mahatagan og higayon ang katawhan sa pagpili sa unsay tukma alang niya nga wa’ magkinahanglan nga ikondinar ang mga tawo ug hatagan sa higayon nga mopili sa tukmang paagi alang nila ug sa pamilya. Giisip nga dakong hagit ning tanan sa atong pagkatawo, apan alang nako—usa ni ka dakong grasya nga atong daygon ug pasalamatan tungod kay sa maong isyu, nahatagan ‘ta sa kamatuoran nga dakong buhi ang demokrasya ug kagawasan—basta wa’ lay simbahan ug gobyerno nga modikta sa mga lakang nga himuon.

Email: [email protected] or [email protected].