Tinud-on pagpriso

May sukaranan ang pagkahugno sa katawhan sa paglingkawas ni kanhi presidente Gloria Arroyo sa Veterans Memorial Medical Center. Samtang di gyud matawag nga prisohan ang tambalanan nga gipahimutangan ni Arroyo sa niaging pito ka buwan, nakabatyag ang katawhan nga mora silang nalipat ug natikasan.

Tungod sa mga pangangkon nga may seryuso siyang sakit, ang mga awhag nga ibalhog siya sa tinuod nga bilanggoan nasapawan sa pagtuo nga ang paggukod sa nangalisbo niyang mga transaksiyon di kinahanglan nga mohikaw sa iyang tawhanong katungod sa pagpatambal.

Karon napahinumdoman ang tanang hingtungdan nga si Arroyo, bisan gapos na sa liog ug di na ingon ana kahawod, di pa gyud diay angayan nga kumpiyansahan.

* * *

Bisan ang mga dumadapig ni Presidente Noynoy Aquino niangkon nga huyang ang mga ebidensiya batok ni Arroyo sa pasangil nga iyang gitikas ang piniliay sa mga senador sa 2007. Kay ang prosekusyon hingpit nga nagsalig sa testimoniya sa kanhi administrador sa Maguindanao nga si Norie Unas nga nakabati siyang gisugo ni Arroyo si kanhi gobernador Andal Ampatuan Sr. nga maniobrahon ang piniliay aron makadaog ang tanang kandidato sa administrasyon.

Ang kundisyon ni Unas nga mohatag lang sa iyang testimoniya kun himuong state witness wa katabang sa iyang kaligdong. Nisamot kahuyang ang kaso tungod sa pag-angkon ni Unas nga wa siyang kasaksi sa aktuwal nga tikas sa piniliay.

* * *

Apan ang pagpasaka sa kasong electoral sabotage maoy nakababag sa paglayas unta ni Arroyo gikan sa Pilipinas sa niaging tuig. Ang paspas nga pagluwat ni Pasay City Regional Trial Court Judge Jesus Mupas og warrant of arrest batok ni Arroyo maoy nakaluwas sa Malakanyang gikan sa pag-apura ni kanhi chief justice Renato Corona nga pagawason na si Arroyo.

Busa ang unang kaso batok ni Arroyo napuslan na. Mas kasaligan ang kasong plunder nga gipasaka sa Sandiganbayan niadtong Hulyo 16 pinasikad sa nabutyag nga pagwaldas sa kuwarta sa Philippine Charity Sweepstakes Office (PCSO).

* * *

Gawasnon si Arroyo kay wa pay arrest warrant nga giluwatan ang Sandiganbayan hangtod karon. Ambot tungod ba kay, sama sa naandan, wa magdali ang Sandiganbayan. O nangiyugpos ang Malakanyang kay nagsalig nga natanggong na si Arroyo.

Kinahanglang bawion ni Aquino ang pagduda sa katawhan nga tinuod gyud diay nga di masilotan ang dagkong mga opisyal sa gobyerno. Kun makaamgo nang Sandiganbayan nga kinahanglan na diay nilang ipadakop si Arroyo, hinaot nga di na sublion ang eskandalo pagpahimutang niya sa tambalanan. Karong nabantang nga baskog diay si Arroyo, sukwahi sa pagtuo nga himatyon na, nagsuruysuroy na man gani sa Tagaytay, hinaot nga isipon na gyud sama sa ubang mga sinumbong sa mga kasong di kapiyansahan. Ug pasuwayon na gyud og hikap sa bugnaw nga mga rehas sa prisohan.

* * *

 Email: [email protected]