Sentido komon

Si Jesu-Kristo ang nasayod sa panginahanglan sa katawhan. Dili na siya angay’ng pangutan-on pa. Nasayod siya dili tungod kay Ginoo Siya kun dili nasayod siya kay sa matag karon ug unya kanunay siyang maniid ug nahimong usa sa mga panghitabo sa palibot mao nga tungod niini nahimo ang milagro sa pagpadaghan sa pan alang kanilang nakasinati og pisikal nga kagutom. Timailhan kini nga bisan pa man sa kayano sa kinabuhi anaa ang Ginoo nga nipakita sa iyang kaayo. Anaa ang Ginoo nga bisan pa man nahikalimtan ang padayon gihapong nipakita sa iyang kaayo.

Fil-Mission Sunday karon. Ingon nga mga nakadawat sa gasa sa pagtuo ang nipakita sa pagpasalamat pinaagi sa pagpadala sa atong mga misyonerong Pilipino ngadto sa mga nagkadaiyang mga dapit sa kalibutan nga nagkinahanglang sabwagan sa maong pagtuo. Sentido komon kini sa mga Obispo kaniadto nga maoy hinungdan sa pagkaumol sa missionary society of the Philippines. Akong pahalipay sa mga kapariang MSP! Sa ilang walay pagkutat nga kakugi diha sa misyon. Sentido komon usab ang kinahanglanon aron mamahimong mas mabungahon ang matag misyonero diha sa pagsabwag sa pulong sa Dios. Dili lang paigo ang Dusong Pastoral ni ang mga Papel nga naghisgot sa mga nagkadaiyang Teolohiya sa Misyon. Labaw na nga dili paigo ang pag-settle lang sa bisan unsang naandan. Kinahanglang mosalom pud kita sa mga risky ug controversial areas sa atong paningkamot all for God’s Glory.