Pagpakabana

Ang katawhan kinahanglan gayud nga magpakabana sa kalihukan sa kagamhanan. Sama sa gihimo nga plebisito sa Barangay Guadalupe kagahapon nga gamay ra ang mga botante nga misalmot, dili kini maayo nga tilimad-on.

Kun unsay resulta sa plebisito – kay pagbuhat nako niining maong lindog wala pa man mahuman ang pag-ihap sa resulta – magmahay tingali kadtong wala mobotar kun pabor o supak ba sila sa pagbuak sa Guadalupe.

Ang uban sa mga botante nga akong napangutana miingon nga gusto sila nga ibuwag ang Sitio Banawa-Ingles gikan sa Guadalupe tungod kay maglisud na kuno pagserbisyo ang mga opisyal sa barangay kanila tungod sa kadaku sa iyang teritoryo.

Ang Guadalupe maoy labing daku nga barangay sa tibuok nasud nga adunay 28,354 ka botante nga katumbas gani sa gidaghanon sa mga botante sa ubang lungsod.

Ang mga opisyal sa Barangay Guadalupe kusganong misupak sa tinguha nga tipakan ang ilang barangay aron ibuwag ang Banawa-Ingles ug himoon nga ika-81 nga barangay sa dakbayan.

Ang reklamo sa mga lumulopyo sa Banawa ug Ingles angay nga hinuktokan sa mga opisyal sa Guadalupe. Tiaw mo nga ang ila kuno nga mga basura usahay pwerteng dugaya nga mahipos kay tungod sa kadaku sa Guadalupe halos dili na maatiman sa mga opisyal.

Mao kini ang rason nga nakahukom sila nga mas maayo pa tipakan ang Guadalupe ug duha ka sityo. Kun molampos gani si Barangay Kapitan Michael Gacasan   pagpadaug niya ang “No vote” (kay wala pa man ang resulta pagsuwat niining lindog) kinahanglang motrabaho na gayud mo pag-ayo.

Tingali ang mga konsehal sa Guadalupe gidistino man og lainlaing nga distrito, sila maoy magsilbi nga mga “Deputy Barangay Captain” sa maong nga distrito. Sila maoy mopahibalo unsay panginahanglan sa katawhan sa dapit nga gitahas kanila.

Nahinumdom ko nga ang akong amigo dihang nag-abang pa sa Singson Village nga sakop sa Guadalupe nga kanunay magpatabang kanako pag-awhag sa ilang mga opisyal nga ipahakut na tawon ang ilang basura.

Gawas sa basura daghan pa nga serbisyo nga gitan-aw nila nga wala kaayo maatiman kay dili na maato sa mga opisyal tungod sa kadaku sa teritoryo sa Guadalupe.

* * *

Gibantayan nako ang gipahigayong plebisito sa pagbuak sa Barangay Guadalupe ug sa pagtinguha nga mamugna ang bag-ong barangay nga gisugyot nga pagatawgon og Banawa-Ingles.