Madagayaong kinabuhi "ANG KASUKO"

Ang kasuko kung atong pasulabihon makapasira kini sa atong pangisip. Sa maong hinungdan ang maayong relasyon maguba ug makapabalik kini sa atong mga kahiubos, kapakyasan ug pagkaputol sa maayong komunikasyon sa atong isigkatawo.

Ang makuha ra nato sa paghambin sa kasuko mao ang kaligutgot nga inanay nga moab-ab sa imong pagbati ug ang kalinaw ug kalipay mahanaw.

Ang kasuko dili ngil-ad kay kabahin man kini sa atong pagkatawo ang makangil-ad ani kung giunsa nimo pagdala. Ang kasuko ikaduha lang sa matuod nga gibati sa usa ka tawo. Kay sa pagkatinuod ang iyang nasuk-an ang iyang mismong kasinatian sa kinabuhi, sa mga butang nga nahitabo nga wala mahiuyon sa iyang mga plano. Ang iyang pagkamakalulooy ug pagkawalay gahom sa pagkab-ot sa gusto niyang abton.

Usahay gamiton kini aron kaintapan ka sa mga tawo apan sa pagkatinuod nahimo kining maskara sa imong pagkatalawan.

“Gisakit mo lamang ang imong kaugalingon pinaagi sa imong kasuko.” (Job 18:4)