EDITORYAL - Mag-unsa ang kumpay kun patay na ang kabayo

Kini ang angay nga ihulagway sa SRP nga gusto sa konseho nga di ipabaligya kang Mayor Rama aron di kaserbisyohan niini ang mga proyekto nga alang sa kaayohan sa siyudad.

Tingale basin nagduda sila nga ibulsa ni   Rama ang halin niini o kaha mabalaka sila nga makaginansya si Rama sa halin o kaha dako kini og madawat nga komisyon. Apan unsa man diay ang katungdanan sa mayor? Di ba ang paggamit sa mga rekurso sa siyudad aron idapat sa proyekto nga angay dapatan niini?

Ang mga pagpaayo sa mga imbornal, pagpaayo sa mga karsada, pag-atiman sa panglawas, edukasyon sa kabataan , pagpalambo sa panginabuhi, ug uban pa , pulos kini mga basic o batakang gimbuhaton sa usa ka mayor

Sama ra sa usa ka amahan nga nagpaeskuyla og anak, nga sa higayong maitos na ang iyang rekurso ug maglisud na sa paggasto aron makalampos sa kurso ang iyang anak, kutob sa mga butang nga masuta niining mapanguwartahan, di ba katungod niyang ipamaligya kini?

Mao ra man usab tingale si Rama, nga kun may nahunahunaan pa siyang kasaligang tinubdan sa panalapi aron igasto sa nagkalainlaing proyekto nga gituohan niyang alang sa kaayohan sa katawhan, di siya maghunahuna sa pagpamaligya sa yuta sa SRP.

Apan unsa may iyang kapangwartahan nga ang gitakda niyang budget nga alang unta to sa ipatuman niyang proyekto sulod sa iyang termino gisurambaw man sa konseho.

Tingale kun wa pa surambawa sa mga konsehal nga pinangga sa katawhan sa dakbayan sa Sugbo ang maong budget, di baya tingale maghunahuna si Rama sa pagpamaligya nianang mga yuta sa SRP

Di man usab gusto si Rama nga tawgon siyang mayor nga magpatisoy lang ug way agi sa iyang pagka-mayor.

Sa usa ka tawong tarong nga gipiyalan ug gitahasan sa katawhan sa usa ka katungdanan, kinahanglang ipakita niya sa misuporta kaniya nga kaantigo siya ug may liderato nga may agi siya sa iyang pagka-mayor nga bisan pa kun dili na siya pilion pag-usab sa umaabot nga election taas ang iyang agtang ug wa siyay ikauwaw sa katawhan tungod kay sa diha pa siya sa katungdanan gihalad niya ang tibuok niyang serbisyo.  

Kanus-a diay ipamaligya ang SRP, unya na kun suyopon na sa dagat ang siyudad sa Sugbo? Ambot kaha sa mga kaatbang karon ni Rama, kun sila pay mayor magmika lang kaha sila? Di   ba?