Ang stupido nga helmet law

Dili motabang sa pagpatuman sa helmet law ang Citom sa dakbayan sa Sugbo. Mao usab kini ang himoon sa dakbayan sa Talisay. Tungod niini murag mag-inusara sa pagpatuman sa helmet law ang Land Transportation Office.

Ang Citom dili motabang sa pagpatuman sa helmet law tungod kay stupido ang maong balaud matud pa ni Citom Chairman nga si Jack Jakosalem. Gawas nga stupido ang maong balaud wala usab kunoy mga tawo ang Citom nga makatabang sa pagpatuman sa nahisgotang balaud.

Ang dakbayan sa Talisay dili usab mopatuman sa balaud tungod kay wala pa kuno sila masayod sa mga patakaran sa pagpatuman niini. Gusto pa silang magpakisayod sa mga patakaran sa pagpatuman niini sa Land Transportation Office ug sa Department of Trade and Industry.

Ang helmet law adunay maayong tumong. Gusto niining maprotektahan gikan sa grabing kadaut ang mga magmotorsiklo nga makasugat og disgrasya sa ilang paglabigar. Ang nakaapan lang kay gisugdan na kini pagsakay sa mga balhiboon og kamot. Ang helmet law nahimong tigpanalipod sa mga kriminal sa ilang paghimo og krimin. Gipasayon sa nahisgotang balaud ang paghimo og krimin sa mga kriminal.

Gawas niini murag klaro usab nga gipangwarta ang nahisgotang balaud kay dili dawaton sa Department of Trade and Industry ug Land Transportation Office ang mga helmet nga dili accredited sa ilang buhatan ang brand niini bisan pa og lig-on ug dekalidad kini.

Gawas pa, kun ang tumong ug tuyo sa helmet law mao ang pagprotihir lamang sa mga tawo nga magmotorsiklo, nganong lisod-lisoron pa man sila? Nganong palinyahon pa man sila sa Department of Trade and Industry aron kuti-kutihon ug hasulhasulon? Dili pa ba diay igo sa Land Transportation Office ug Department of Trade and Industry ang pagpalit sa mga magmotorsiklo sa gi-prescribed nila nga helmet brand? Gituyo ba ni nila aron masuyop ug maklaro nila pagkuwenta kun pila gayod ang maila sa komisyon? Ambot lang!

* * *

Belated happy birthday diay ni sir Arnold Barlaan, magtutudlo sa Southwestern University nga nagsaulog sa iyang adlaw nga natawhan kagahapong adlawa. Long live Sir.