Ang kampanya sa pagsumpo sa ginadiling drugas

Dugay na nga gihingusgan sa kagamhanan ang kampanya sa pagsumpo sa pagkuyanap sa ginadiling drugas dinhi sa nasud pinaagi sa pagdakop sa mga nalambigit sa pagpayuhot ug lakip sa mga tawo nga naghupot ug naaktohan sa paggamit sa cocain, shabu, marijuana.

Ang mga sakop sa Philippine Drugs Enforcement Agency (PDEA) maoy gitahasan sa kagamhanan sa pagpasiugda og mga operasyon alang sa pagsikop sa mga nalambigit sa maong ilegal nga kalihokan ug kauban nila ang kapolisan, National Bureau of Investigation (NBI) ug uban pa.

Giabagan usab kini sa mga lokal nga kagamhanan pinaagi sa pagpasiugda og mga information and awareness program ngadto sa kabarangayan nga ang katuyuan mao ang paghatag og kasayuran sa mga batan-on ug hingkod na ang panuigon sa mga kadaut nga maangkon sa mga tawo nga nagumon sa paggamit niini.

Daghan ang nag-ingon nga dako ang gigahin nga salapi sa kagamhanan alang sa pagpasiugda og mga kalihokan sa pagsumpo sa ilegal nga drugas apan ang makapasubo nga palandungon tungod kay nagpadayon gihapon ang ilegal nga drugas sa iyang pagkuyanap.

Ang mga lokal nga kagamhanan sa ilang pagpasabot ngadto sa katawhan sa malambigit sa ilegal nga drugas maoy ilang paingnan ang tulo lamang ka mga lugar.

Matud pa nila kun dili mabalhog sa bilanggoan ang tawo nga nalambigit sa ginadiling drugas, adto kini paingon sa hospital ug kun dili man gani adto gayod paingon sa mabugnaw nga lubnganan.

Gipasabot nila nga mabalhog sa bilanggoan ang nalambigit sa paggamit o pagpayuhot sa ilegal nga drugas kay nadakpan man sa mga PDEA o mga polis.

Mahimo usab nga adto paingon sa tambalanan kay sa paggamit sa ilegal nga drugas mosangko man usab kini sa kadaut sa kalawasan sama pananglit kun maaksidente sa sakyanan o nakakita og away nga maoy hinungdan nga napusilan o nadunggaban.

Ang labing makapasubo nga palandungon kun adto paingon sa mabugnaw nga lubnganan kay namatay man sa aksidente. Napusilan o kaha nadunggaban sa gikaaway niini nga laing adik-adik.