Nabalaka sa pag-usbaw sa biktima sa dengue

Ang nagpadayon nga pag-usbaw sa gidaghanon sa biktima sa dengue karong tuiga maoy nakapatumaw karon sa mga kadagkoan sa Department of Health (DOH) 7 nga hayan nga daghan pa karong tuig 2012 ang gidaghanon sa gitakboyan og sakit nga dengue nga naggikan sa pinaakan sa lamok kun itandi sa miaging tuig.

Sa ulahing talaan sa buhatan sa DOH 7 maoy nasuta nga sukad sa Enero hangtod sa Hunyo 30 niining tuiga maoy natala ang kapin na sa 3,000 nga gidaghanon ang gitakboyan sa maong sakit nga dengue kun itandi sa gidaghanon sa tuig 2011 nga nanukad sa bulan sa Enero hangtod sa Disyembre maoy ilang natala ang 3,700 lamang ka mga biktima. Kini maong gidaghanon sa mga biktima iyang gipadayag ni Dr. Wyben Briones sa Rotary Club of Cebu ug usa ka anti dengue advocate ug nagpasiugda og mga kalihokan sa pagpakgang sa maong matang sa balatian sa lainlaing dapit dinhi sa Sugbo.

Gikumpirmar usab kini ni Dr. Reynan Cimafranca sa DOH 7 ang padayon nga pag-usbaw sa maong gidaghanon sa mga biktima sa sakit nga dengue dinhi sa Sugbo.

Gibutyag ni Dr. Cimafranca nga dinhi sa rehiyon 7 ang dakbayan sa Sugbo maoy nag-una sa labing daghan nga biktima sa dengue   sukad sa bulan sa Enero hangtod niadtong Hunyo 30 niining tuiga.

Matud pa ni Cimafranca nga mokabat 1,667 ang gitakboyan og sakit nga dengue ug napulo ang namatay niini ug gisundan kini sa dakbayan sa Dumaguete nga maoy ikaduha sa gidaghanon nga 228 apan walay namatay niini. Si Dr. Briones dihang nahinabi sa mga tigbalita atol sa Tapok-Tapok sa Sugbo miingon nga naghimo na sila og anti dengue operation pinaagi sa ilang gipasiugdahan nga mosquito larvicide campaign sa dakbayan sa Lapulapu nga giabagan sa mga kawani sa Mactan Export Processing Zone (MPEZ) sa maong dakbayan.

Matud pa ni Briones nga ilang gipasubay sa upat ka mga formula ang ilang kampanya sa pagsumpo sa sakit nga dengue nga naglakip sa Search and destroy, Self protection measure, Seek early consultation ug Say no indiscriminate fogging. (Romeo T. Limpangog)