Dugo sa politika

Kun ang taga Bando Osmeña Pundok Kauswagan (BOPK) ang pasultihon, sayop sa kampo ni Cebu City Mayor Michael Rama nganong nahimugso ang kontrobersyal nga Type O campaign nga karon imong makita sa daghang bahin sa dakbayan ang mga poster ug streamer. Giingon nga ang mga tawo nga mosu’d sa city hall nga tataw nga iya sa kampo ni Kongresista Tomas Osmeña tawgon og type O. Karon gisakyan sa kampo ni Osmeña ang pagsungog sa ilang mga supporter ngadto sa usa ka kampanya alang sa kandidutara sa ilang standard bearer, si Kongresista Osmeña.

Apan mas pang nakuryoso ang publiko dihang nipiyait si Mayor Rama ug buot ipatangtang ang mga Type O streamer nga gipamutang sa bisan asang bahin sa syudad. Ug aron di’ maklaro nga adunay bahid politika ang pagpatang-tang sa mga Type O streamer nga klaro ‘sab nga adunay kolor politika, buot sa mayor nga ipatang-tang ang streamer lakip na ang sa iyang apohan nga dugay nang gimuntar sa mga poste pagpahinumdum sa ika-75 nga anibersaryo sa Cebu City charter. Wa’ siguroy nakatambag sa mayor nga mas pang mabantog ang usa ka butang o lakang kun hatagan kini og bili sama sa pagpatang-tang sa maong mga poster ug streamer.

Wa’ sab siguroy nakatambag sa mayor o posibleng aduna apan wa’ niya paminawa nga bisan pa kun ipatang-tang ang mga type O streamer ug poster sa mga publikong dapit, wa’y balaod nga makapugong sa mga tawo sa pagbutang ini sa ilang pribadong mga balay, patigayon ug uban pang pribadong dapit. Wa’ siguroy nakapahimangno sa mayor nga kung imong hatagan og bili ang usa ka yanong kampanya sama sa type O, mas dako ni og epekto sa atensyon sa mga tawo nga mas pa hinuon nga mopahinumdum nila unsa ang buot ipasabot ini sa matag higayon nga ilang makita ang type O streamer nga tataw nang nagpasabot nga type Osmeña o dapig silang Osmeña.

Sayo pa arong magkisi-kisi alang sa midterm election nga mahitabo onse ka buwan gikan karon. Apan alang sa mga politiko nga adunay planong magpasubli o mangayo og bag-ong mandato kuwang pa ang maong panahon aron ibaligya ang ilang panga’n ug itanyag ang ilang serbisyo kuno ngadto sa katawhan. Ug ang paghimo og propaganda sama sa Type O campaign usa ka lakang nga maoy sagad nga himuon aron mas mosikat ang kampanya ug mahinumduman sa katawhan. Ang bag-o mao nga karon pa lang gigastohan na ang pagpahimo sa maong mga streamer ug poster sa kampo man sa BOPK o sa pribadong indibidwal nga wa’y nakasiguro unsay bugti ang ilang gipangayo sa pabor   nga ilang natabang sa grupo.

Apan di’ lang ang Type O posters ang lakang sa mas sayong pagpangampanya. Sa barangay Tejero sa dakbayan sa Sugbo, di’ ang pahiyom sa mga opisyal o mga kawani sa barangay ang mosugat nimo apan ang dakong streamer nga nagbutyag nga solid BOPK ang ilang barangay. Alang nako mao ni ang labing iresponsableng lakang sa usa ka barangay. Nasayod ang tanan nga ang BOPK usa ka politikanhong partido. Ug ang barangay, wa’ maglangkob lang sa mga opisyal nga gipili sa katawhan. Angay natong hinumduman nga ang katawhan mao ang barangay ug ang barangay mao ang katawhan. Ang pagbutang og usa ka streamer nga nagpahibawo nga BOPK ang maong barangay, di’ tingog sa katawhan nga nagpuyo sa maong dapit apan tinguha sa mga opisyal sa barangay nga karon pa lang nipadayag na og pagdapig. Kun ang usa ka residente didto dapig sa kampo ni Rama, aduna pa kaha siya’y kaisog sa pagduol ug pagpangayo og tabang sa barangay nga iyang giisip nga kadangpan?

Kabahin sa inadlaw-adlaw nga pagpuyo sa mga politiko ang politika. Gani, lisud ang pagsuta unsa ang tinuod nga pangalagad sa unsa ang ulog-ulog lang aron sa pagkuha sa boto ug suporta sa mga tawo. Apan angayan nga isipon sa mga politiko nga di’ bugo ang mga botante, di’ mahaylo sa salapi ug dili mailad sa mga propaganda. Lisud ning mahitabo sa mga taga dakbayan sa Sugbo nga mas naila sa kalantip sa panghuna-huna ug kadasig sa pag-ila kinsa ang nigamit ug ni-ulog-ulog nila.

Email: [email protected] or [email protected]