Dunganon ang national ug barangay election

Gibutyag ni Senate President Juan Ponce Enrile sa gitapok nga mga barangay kapitan sa dakbayan sa Sugbo nga gisuportahan niini ang balaodnon nga nagtinguha sa pagdungan sa barangay election ngadto sa gikatakda na nga national election karong 2016.

Dihang gipadayag kini ni Senate President Enrile dili ikalimod nga gibati gayod og hilabihan nga kalipay ang mga barangay kapitan nga mga pulpol sa paghupot sa katungdanan.

Dugang nga nalipay mao ang mga barangay kapitan nga anaa na sa ilang katapusan nga termino ug mosugot sila o dili siguro na man gayod nga sila mahulipan kay dili na man makaapil sa piniliay sa barangay sa 2013.

Gihimong hinungdan sa pag-oktaba sa piniliay sa barangay mao ang kaduol sa gintang sa lokal nga piniliay sa 2013 ug nagkinahanglan na usab dakong kantidad ang kagamhanan.

Sa pagsubli nga pagtumaw sa plano nga pag-oktaba sa barangay election daghan usab ang mipadayag sa ilang pagsupak ug nakasaway pa ngadto sa mga opisyal nga naghimo og mga lakang nga kalugwayan og dugang tulo ka tuig nga paghupot sa katungdanan sa mga barangay kapitan.

Matud pa nila nga gihimo lang hapin nga katarungan ang magasto nga salapi sa pagpahigayon sa piniliay sa barangay nga maoy hinungdan sa pag-oktaba niini.

Wala motug-an sa tinuod nga hinungdan nga kun mahinayon ang piniliay sa barangay dugang usab nilang galastohan nga mga politiko nga naglingkod sa katungdanan tungod kay   ang mga barangay kapitan nga magpasubli sa katungdanan mangayo man kini kanila og pinansiyal nga suporta.

Dugang pa nila nga ang paglugway og mga tuig sa mga naglingkod nga barangay kapitan maisip nga dugang pag-antos sa mga molupyo nga nakabaton og barangay kapitan nga tapulan ug wala makahatag og maayong serbisyo sa iyang paghupot sa katungdanan.