Tingog Sa Katawhan

CEBU, Philippines - Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.

‘Paghimo’g Santos panapi?’

Unya sa Oktubre, ideklarar nang Santo si Beato Pedro Calungsod. Ilhon na siyang balaan tipon sa talay sa mga santos sa langit. Apan ang pundok sa ubang tinuohan, o dinominasyon, mahinaway gayud niini. Kini kuno, usa lamang ka gamagama, o tinumotumo sa simbahang Katoliko. Usa ka dakung panapi. Ang libro nga Catholic Encyclopedia vol. II pahina 369, nagkanayon.

“Expenses — If he chooses to spend a moderate sum the entire cause from the first process to solemn beatification will not cost him less than 20,000 dollars. The expenses from the process from beatification to canonization will easily exceed 30,000 dollars.”

Daku kining kantidad ug pil-on pa kini kun ibalhin sa atong salapi. Kun mao, ang paghimo’g santos alang lamang diay sa mga adunahan? Matud pa, ang pagka-balaan gasa nga wala’y bayad kay ang Biblia nag-ingon: “Ingon nga pinaagi sa grasya sa Dios, mahimo silang matarung pinaagi kang Kristo Jesus nga nagaluwas kanila.” (Roma 3:24).

Apan angay usab hinumdoman, nga bisan unsang butanga nga himuong dokumento publiko, aduna gayu’y galastohan. Pananglit sa pagpanotaryo, susihon sa mga eksperto kun di ba minaomao, o tinumotumo.

Mahitungod sa tawong ilhong santo, o santa, ihangyo gayud sa Santo Papa. Ipaagi kini sa imbestigasyon sa mismong kinabuhi sa ilhong santo, kun haom ba kini kaniya.

Ang paghipos sa mga testimonya, mga testigos, ang gituohang mga milagro, ipaagi pa sa makuting pag-usisa sa seyentipikanhong pamaagi aron pagprobar nga dili kini peke o mini.

Makagasto gayud alang sa pulyito, mga imprenta alang sa kasangyawan. Ang mga debutos, mohangyo sa Dios pagpakita og milagro aron pagmatuod nga santos na ang maong tawo.

Gastohan gayud kini og salapi, dili dali-dalion pagdeklarar nga santo na, o santa, kay mahimo kining kataw-anan. Kun ugaling wala’y milagrong mahitabo, dili gayud madeklarar nga santos ang usa ka tawong giilang balaan.

Ang pagkasantos maoy bunga sa merito sa dugo ni Kristo, wala ipasabot nga ang salapi, maoy nakapahimong santos. May buhatong milagro ang Dios niadtong tawo nga iyang gidawat. (Hebreo 2:4). Labot pa, abagahon sa mga sponsors ug mga debutos ang galastohan ug dili tingali kini matawag nga panapi.