CITOM loyalty awards

Nagkakita mig usab si Tito C. Paloga sa may dalan Leon Kilat usa ka hapon, nakalimot na ko niya, apan, nahinumdom pa siya nako. Sa dayon na niya’g isyu sa tiket: “Ikaw diay, Sir? Ako bitaw tong imong gihisgutan sa Banat News, dugaydugay na,” eksplikar ni Tito, sa diha nga iyang nakita nga nagpaka-aron ingnon lang ko nga nahinumdom pa ko niya.

Unya, misumpay siya: “Napulo na ko ka tuig sa CITOM ug usa ko sa nakadawat og P10,000 loyalty cash award gikan sa city hall, 18 mi ka mga awardees.” Ako siyang gi-congratulate, ug ako siyang gipasidan-an nga kinahanglan magbinuotan gyud sa trabaho. Ugma, Domingo, nagtampuhay sila, mangadto sa Birhen sa Simala, magpasalamat, dayon mangaligo sa dagat sa Tungkop, Minglanilla.

Ako siyang gipangayoan sa mga ngalan sa kauban niyang awardees . Mihatag siya, kutob lang sa iyang mahinumdoman, ania: Tonio Avila, Marlon Garbo, Dante Babatuan, Arthur Noel, Ophelia Villamor, Guada de la Cerna (lagmit ako ning paryente), Ramon Abella, Teresa Usman Llamedo, Cris Villanueva, Ronnie Olis, ug sila si Cabacos, Aniban, ug Fernandez (wa na siya kahinumdom sa mga first names).

Nindot ni. At least atong i-recognize ang mga maayong buhat sa mga alagad sa gobyerno sama sa mga sakop sa CITOM … nagpainit ug nagpa-uwan sa kadalanan matag adlaw. Usahay ra ba ato ning i-overlook. Ug lagmit, ang basis sa pag-award, dili lang ang kadugayon sa serbisyo, kundili, ang performance ug dedication sa ilang pag-alagad.

Samtang dunay mga arogante nga sakop sa CITOM, subra ka istrikto, dili kamaong mo-consider, apan, majority kanila, courteous kaayo, friendly, smiling, considerate … usahay gani, sila pa ang muabli sa pultahan sa imong sakyanan, motabang pag sinyas aron kalikayan ang disgrasya.

In some instances, sa diha nga giusbawan na ang parking fee, ako silang komedyahan, nga di ba mahimo anha na lang i-deduct sa 20 pesos ang alang sa mga watch-your-car men and women?

Hunahunaa lang … kun sa usa ka adlaw, duna kay upat ka dapit nga adtoan o bisitaan, ang imong parking fee muabot og P80 sa tag P20 matag park… unya ang rate karon sa mga watch-your-car boys and girls, P5 man (kay kun mohatag kag P2, yam-iran ka lang) ang imong magasto matag adlaw sa pagparking lang sa kadalanan … P100.00. Pila na man ni sa usa ka bulan?

Anyway, naghisgot man tag panakayan sa kadalanan, si Dodong Casinillo mi-text kanato bahin sa usa ka honest nga taxi driver. Misakay siya gikan sa SM hangtud sa ilang balay. Pila ka minutes gikan sa iyang pag-abot, nakamatikod siya nga nahibilin ang iyang pitaka nga puno sa kwarta. Nangluspad siya. Hapit na siya yawyawi ni Linda.

Mga 20 minutes later … mibalik ang taxi, pag-abli niya sa gate … gitunol sa driver ang pitaka, intact. Nangluspad na sad si Dodong … apan sa kalipay. Ang driver, si ROSALITO QUEJADA OAFER sa Marmic Taxi, Body no. 1732. So, there you are. Duna pa gyuy honest ug buotan nga Pinoy, taliwa sa atong kalisud. In fact, daghan pa ni sila. Lagmit kun, magdawatan pa sila’g pork barrel, ila gyung i-account ang ilang madawat up to the last centavo, sama sa gihimo ni Tingting sa kongresista pa siya.