Dakung krises

Human sa bakasyon, enrollment ug klase na’sab unya diha sa mga pribado ug mga pampublikong eskuwelahan dinhi sa lainlaing bahin sa atong nasud sa Pilipinas. Ang DepEd mopuno og laing usa ka tuig diha sa naandan, kay matud pa aron kuno mabaid ang dugang kahibalo alang sa mga tinun-an ug unya makasugakod kini sila ngadto sa mga langyaw.

Dugang krises kini kanatong mga ginikanan, kay sa miaging katuigan naglisud man gani kita pagpalampus bisa’g sa high school nalang sa atong kabataan bisa’g duha ra ka bata atong anak, unsa na kaha kun pun-an na’ sab og laing tuig ang ilang pag-eskuwela, ilabi na nga sa pagka-karon 90 milyones naman ang atong gidaghanon dinhi sa isla sa Pilipinas.

Kaniadto inig ka-siyete anyos sa bata, diritso silang ma-enroll og grade one, unya, magsipit dayon kini’g bag nga buli nga gisudlan sa lapis ug papel, unya, magtiniil pa kini silang molakaw’g pila ka kilometros, kay wala pay sakyanan, karon aduna na gani schoolbus ug mag-agi na’g nursery, kinder one ug kinder two, una pa mag-siyete ug mag-enroll sa grade 1.

Daku na kaayo’g kalainan karon ug sa kaniadto, kay sa nursery ug sa elementary pa lang, magsangkii’g intawon kini sila sa kabug-at sa bag nga puno sa mga libro ug uban pang mga gamit niini, kay lahi sa kaniadto, matag adlaw, dad-on naman gyud ang tanang mga gamit ug isulod na kini sa bag karon nga mokantidad nag P2-3,000.00.

Maayo unta’g ilibkas kini sa DepEd ang maong plano, kay kun idayon kini, daghan na kaayong dili na maka-eskuwela, daghan na kaayong tulisan, kawatan, ug mga badlongon sa katilingban, 90 milyones na kita, ang abot diha sa atong kaumahan, kaingin, ug basakan, dili na paigo sa atong gikinahanglan. Atong supply kulang na sa demand.