EDITORYAL - Ang pagpanglarot sa mga lamppost

Ang pagwagtang sa mga lamppost sa mga sidewalk   usa sa paagi nga makalimtan sa publiko ang dayag kaayong panlimbong sa mga opisyal sa goberno.

Kay kun magpunay og barog ang maong mga lamppost sa gitarokan niini magsurok ang dugo sa katawhan nga magsud-ong sa gihimo sa mga opisyal sa kagamhanan kinsa nagtuo nalang gyud nga bugo ang tanang tawo nga di kaantigo mosil-ing sa ilang kinabuang nga pagpapresyo sa maong mga butang.

Tan-awa gud ang lawas sa lamppost kun angayan bang presyohan og P250 mil ang   matag usa niana.

Ang mga opisyal sa kagamhanan nga misugot ra sa maong presyo wa baya makuyapi sa kaklaro nga gibinuangan ra sila.

Asang dapita sa maong  lamppost nga sarang bayran sa tawong tarong og P250 mil.

Sa iyang lawas?, sa pandong? sa bombilya? sa kuryente? o sa pintal? Hesus kun imong sil-ingon ang maong poste, magtuo ka nga may gold    ang sulod niini nganong mahal man kaayo.

Unya  kun maoy gipresyo sa supplier, unsa may mentalidad sa mga opisyal sa goberno nga misugot sa maong presyo.

Wa sila magpa neuro test sa wa pa sila manarbaho sa goberno? Kay masabot man nimo nga wa gamita pag-ayo ang ilang utok aron pagsuta kun di ba sila hisabtan sa publiko kinsa dali kaayong makamatikod kun unsay tinunto.

Karong gitugot na sa kagamhanan nga laroton ang maong mga lamppost, daghang nalipay .

Kay kun magpabilin ang maong mga lamppost   sa sidewalk, bisan pa kun napahamtangan na og silot ang mga opisyal nga nalambigit sa maong binuang , magtutok ka sa maong lamppost di malaksi sa imong galamhan ang paghunahuna nga kun unsa kataas ang ilang gi-presyo niini, ingon usab niana kamubo ang imong pagtan-aw sa ilang pagkatawo. Di   ba?