Taphaw'ng kadaugan
Human sa usa ka dekada nakab-ot ra sa pamilyang Bacolod ang hustisya nga dugay na nilang gipangandoy.
Kini human ang korte mipahamtang sa silot nga reclusion perpetua kon pagkapriso gikan sa 20 ngadto sa 40 ka tuig batok ni PBMA supreme master ug Dinagat Rep. Ruben Ecleo, Jr.
Gawas nini gimando sab ni RTC judge Soliver Peras ang pagbayad og kapin sa P26 milyones isip danyos ngadto sa pamilyang Bacolod.
Ang kaso nag-ugat sa giingong pagpatay ni Ecleo sa iyang asawa nga si Alona Bacolod niadtong Enero sa tuig 2002.
Apan bisan kun duna nay hukom ang korte sa kaso dili pa hingpit ang kadaugan sa hustisya.
Kini tungod kay wala pay kasigurohan kanus-a masilbihan ni Ecleo ang iyang silot.
Wala’y kapuslanan ang silot nga gipahamtang sa korte kun dili madakpan si Ecleo.
Angayan natong hinumduman nga dili ni unang conviction ni Ecleo sa kasong kriminal.
Sa wala pa ang disisyon sa kasong parricide daan na nga konbiktado si Ecleo didto sa Sandiganbayan tungod sa kasong graft and corruption.
Ang Sandiganbayan mipahamtang niya og silot nga pagkapriso sulod sa 30 ka tuig.
Taud-taud na ang maong disisyon apan hangtud ron wala ni masilbihi ni Ecleo human siya mokagiw.
Ang kapin sa usa ka gatos ka libo ka mga polis sa tibuok nasud inutil sa pagdakop niya.
Karon duha na ka silot ang nagpaabot ni Ecleo. Ang pangutana, kanus-a hingpit bayran ni Ecleo ang iyang salaud?
Hagit ni sa kapolisan ug mismo sa administrasyong Aquino pagsiguro nga mapahamtang ang hustisya sa wala’y pagpinig.
Kun gilutos ni Aquino ang mga gidudahang nalambigit sa korupsiyon hinaut mamahimo niyang prioridad ang pagsiguro nga madakpan ang usa ka opisyal nga konbiktado sa pagpangurakot ug pagpatay sa kaugalingong asawa.
Hinaut isalikway ni Aquino ang iyang alyansa sa politika uban sa mga Ecleo didto sa Surigao del Norte ug tumanon ang iyang saad alang sa limpiyo ug tul-id nga dalan sa panggobyerno.
Hangtud nga dili mapriso si Ecleo ug moserbisyo sa iyang silot magpabiling taphaw ang kadaugan sa hustisya alang sa mga biktima ni Ecleo.
* * *
- Latest
- Trending
