Kalihukang paranormaal

Agig sanong sa pipila ka mga hangyo sa akong mga higala nga nangutana kalabot sa Paranormal Phenomena, akong gituyo pagtagik ang mga mosunod nga mga hilisgutan kalabot niini. Nahimo nakong tinubdan ang Internet labina gyud ang web sa Paranormal Central ingon man ang mga libro ni Fr. Jose Francisco Syquia ang Archdiocesan Director sa Office of Exorcism sa Artsdyosesis sa Manila nga mao ang: Exorcism, Encounters of the Paranormal and the Occult ug the Excorsist: Spritual Journey ug ang mga salida: The rite, the exorcist, paranormal activity.

Kasagaran dunay moduol kanako sa kumbento aron magpa-schedule og blessing sa ilang balay kay lagi dunay mga katingad-an. Makadungog sila’g mga tingog , dunay mga tunob, ang mga butang mawala ug makit-an.

Kanunay’ng magkasakit ang miyembro sa pamilya. Kini ang uban pang mga butang ang buot nilang hisgotan kun ugaling magpatawag sila’g pari aron maoy mobendita sa ilang balay.

Ang nakadaut kay dunay mga segurista kaayo kay human nila’g pabendita og pari, magtawag pa gyud sila’g diwatahan kon occult practitioner. Sa tuyo nga makatabang aron mahatagan og katesismo ang katawhan mahitungod ning mga butanga, akong ipaambit kaninyo ang mga pipila ka mga mahinungdanong pagtulon-an kalabut niini ug unsa ang gitudlo sa Simbahang Katoliko mahitungod niini. Dili ko usa ka excorsist o licensed demonologist (ang nagtuon sa mga demonyo), apan sa tinuod   dinhi sa ato sa Sugbo wala kitay komisyon nga nag tuki sa mga Paranormal Phenomena ug gani, maihap lang sa tudlo ang mga pari dinhi sa ato ang maisip nga Excorsists.

Hinaut unta nga pinaagi niini ginagmay nga tampo matabangan ang mga salabutan sa atong mga kaigsuonan. Tuyo ko nga sabton nato kining maong isyu sa lamdag sa pagtulon-ang Katoliko ug sa Balaang Kasulatan. Busa ubani ako ninyo sa atong pagsulod ug pagpamalandong sa kalibutan sa mga kalihukang Paranomal.