Panday'ng walay gabas

Nagkulang ug haw-ang kaayo ang serbisyo sa atong mga magbabalaod didto sa kongreso ug sa senado niining panahona karon. Pagpanday og mga balaudnon maoy ilang tahas para sa kaayohan sa kinatibuk-ang katawhan dinhi sa atong nasud nga Pilipinas.

Apan, naunsa naman hinuon kini karon, nagkaguliyang naman lang mo mahitungod niining impeachment proceedings nga mao nalang hinuo’y inyong nabuhat karong panaglalis ninyo kabahing CJ Corona. Dakung kaulawan kini ngadto sa kanasurang gawas, kay nag-unay-unay nalang kamo’g tuki’s binuhatan diha sa atong mga dagkung haligi sa kagamhanang isla sa Pilipinas.

Matud pa sa kanhi tang mga katigulangan, kun daghan kuno og bunga ang mangga, labayon gyud kini, kay kasagaran kanato, gusto gyung kab-oton ang bulan, apan layo ra kaayo kini sa tinuod, kay ang balay’ng inyong gitukod ug gipanday, gilinog kini ug nalubong ilawom sa yuta, kay gikastigo na diay kita sa kahitas-an.

Tingali moabot na ang panahon nga mao ‘sab kini inyong dangatan, kay gikan ni Marcos, Estrada ug ni Gloria, karon ang labing daku na gyud sa Korte Suprema ang gihatagan ninyo’g dakong pagtagad. Nalimot o nabungog tingali kamo sa P210 milyones nga inyong gidawat sa pork barrel sa inyong matag termino, gikan sa nagkadusingot nga magbubuhis. Ang gaba ra ba kuno, dili magsaba, ug ang maginukdanon, gukoron ‘sab kini sa toro nga labaw pa nimo ka sungayan.