Asa ka mag-semana santa?

Unsay haom nga himuon sa semana santa? Mag-ampo o magbakasyon? Daghan ang naglibog unsay tukmang kahulogan sa semana santa tungod kay sagad sa mga Pinoy, mas giplanohan ang mga lugar nga duawon aron makapahuway gikan sa ilang trabaho itandi sa mga pagplano unsaon pagpalambo sa espiritwal nga aspeto sa kinabuhi. Ang labing mahinungdanon sa kadaghanan, magamit ang taas nga bakasyon pinaagi sa pagpahuway ug pagsadya uban ang mga barkada o pamilya. Apan ang tinuod nga kahulogan sa semana santa, nga mao ang paghandom sa pasakit, kamatayon ug pagkabanhaw ni Hesu Kristo nabutang lang nga alternatibong buhatonon sa mga mosunod nga adlaw sa semana santa.

Alang sa mga buot maghinuklog ug mag-pilgrimage karong semana santa, di’ na kinahanglan nga molayo pa. Adunay mga lugar nga mahimong maduaw sa dakbayan sa Sugbo ug di’ na kinahanglan nga mogasto pa og dako ug magpalayo pag-ayo. Ang mao nga mga dapit nga akong naduaw, adunay susamang tumong—ang paghatag og malinawon nga lugar alang niadtong buot maghinulsol sa mga sala ug mag-ampo sa kahitas-an. Ang maong mga lugar dugay nang nagbukas sa Sugbo ug ang uban wa’ pa mabaniog sa ilang tinguha sa pagdawat og mga grupo o indibidwal nga buot mopaubos sa retreat ug recollection.

Tabor Hill — Gikan sa North General Hospital sa barangay Talamban, sayon nalang nimong matultolan ang maong dapit. Sukad matukod 17 ka tuig na ang nakalabay, nahimong sentro sa mga pilgrim ang maong dapit sa milabay nga napu ka tuig. Sentro sa maong lugar ang station of the cross nga nagpalibot sa lugar. Adunay chapel ug simbahan nga mahimo nimong maduaw kun buot nimong makighinabi sa kahitas-an sa mingaw nga paagi. Adunay napulo ka mga pari nga giandam ang paring Agustino. Apan karong semana santa, espesyal ang lugar tungod kay imong makita ang kapin 600 ka mga relic sa mga santos. Naka-display karon ang bahin sa veil ni Birhen Maria, ang bukog sa mga santos sama ni St. John, ang tipaka sa krus nga gilansangan ni Dismas (kadtong kawatan nga gilansang sa tuong bahin ni Kristo), tipaka sa lamesa nga gigamit sa last supper. Apan sentro sa usa ka exhibit ang tipaka sa krus nga gilansangan ni Hesu Kristo. Karon semana santa, mas duol ka sa mga karakter ug personalidad sa Kalbaryo atol sa pasakit ug paglansang sa Ginoo pinaagi sa imong pagduaw sa Tabor Hill.

Sisters of St. John — Kun nagpuyo ka sa habagatang bahin sa syudad sa Sugbo, haom nimo ang kombento sa mga madre ni St. John. Bukas ang maong lugar sa tanan labi na sa mga kabus nga batan-on. Mahimong mopuyo sa lugar nga libre sa lawak ug pagkaon. Tungod kay anaa mahimutang sa taas nga bahin sa San Carlos Heights sa barangay Pardo, mingaw ang lugar ug haom alang sa pag-ampo.   Tumong sa mga madre nga mag-ampo sa halos matag oras. Mahimo kang mosalmot sa ilang prayer vigil ug sa misa matag adlaw. Sentro ang kombento sa mga madre sa maong congregation sa tibuok Asya. Sa maong dapit, ingon og sa imong matagamtaman ang langit sa yuta tungod sa kahilom ug pag-ampo nga gihimo sa mga madre.

Missionaries of Africa —  Su’d sa Sto. Niño Village sa barangay Banilad sa syudad sa Sugbo, di’ lang ang balay ni Ricardo Cardinal Vidal ang imong makita dinhi. Ang maong dapit ‘sab ang nahimong pinuy-anan sa Missionaries of Africa. Bukas ang maong dapit alang niadtong buot mopa-ubos sa individual retreat ug recollection. Adunay lawak nga mahimong kahigdaan ug adunay pagkaon sa tibuok adlaw. Giklaro sa mga pari nga sakop sa misyonaryo, wa’ silay tukma nga singil sa mga buot mo-ambit sa serbisyo. Bisan pila nga donasyon nga mahimo na alang sa imong pag-istar sa dapit. Aduna kay kaugalingon nga retreat master nga maoy mohan-ay sa imong programa aron nga mas magmabungahon ang imong pagpuyo uban ang mga pari.

Managlahi man ang atong diskarte karong semana santa, ang labing mahinungdanon nga di’ kalimtan ang labing mahinungdanon nga kahulogan sa okasyon. Ang pagpasakit, pagkamatay ug pagkabanhaw ni Hesu Kristo, atong kinabuhi ug paglaom. Ato man nga giisip nga bakasyon ang mga adlaw sa semana santa, mahimo unta ning bakasyon gikan sa atong normal nga adlaw sa pagpakasala ug pagpukan sa atong kaugalingon sa matag higayon nga mohimo ‘ta og kasaypanan. Inay, mahimo untang dakong lakang sa kausaban ang maong mga adlaw aron mobalik ‘ta sa sunod semana nga adunay maayong kausaban uban sa pagsaulog sa pagkabanhaw ni Kristo.

* * *

Email: [email protected] or [email protected]