Child custody

Balaang Miyerkules sa tanang readers sa Banat News.Taliwala niining pag-obserbar nato karon sa Holy Week, atong hisgutan ang pangutana may kalabutan sa custody sa bata. Kining maong problema sagad nga motumaw kun adunay problema ang magti-ayon ug unya mag-ilog sa custody sa ilang mga anak.

“Dear Atty. Divine,

Kanunay ko nga nagsunod sa imong column nga Legal Corner ug mao ni nakaaghat nako sa pag-email tungod sa akong problema karon. Aduna koy anak nga 5 anyos nga anak nako sa pagka dalaga.Naminyo ko niadtong miaging tuig ug ang akong bana nakadawat ra sa akong anak ug gani pinangga niya. Apan karong bag-o kalit lang nga mitunga ang tinuod nga amahan sa akong anak ug gusto niyang kuhaon ang kustodiya sa akong 5 anyos nga bata.Gihimo niyang rason ang akong pagkaminyo kay kono di na maatiman nako ang among anak ug nahadlok siya nga daug-daugon kono namo ang bata ilabi na kay aduna na koy laing anak. Ang akong pangutana Atty. Divine mamahimo ba nga makuha sa amahan ang custody sa akong anak? Unsay akong buhaton? Hinaut imo kong magiyahan sa akong problema. — Fely S.”

* * *

Fely S,

Salamat sa imong pag-email sa Legal Corner. Basi sa balaod, ang bata nga nagpangidaron pa lang ubos sa 7 anyos dili kini mamahimong mabuwag sa iyang inahan, mao nay nalatid sa Art. 213 sa atong Family Code isip general rule. Apan kun ang korte adunay makitang compelling reason kon bug-at nga rason mamahimo niining ihatag ang custody ngadto sa amahan. Kun ang bata sobra na sa 7 anyos, basi sa balaod, siya na ang papilion kun kinsay gusto niyang kuyugan, apan kun makita sab sa korte nga dili makaayo sa bata ang iyang gipili tungod kay drug addict, palahubog, immoral, momaltrato ug way trabaho, ang korte na maoy modesisyon niini.Sa imong kaso, maayong pagka-atiman ang bata busa way rason nga mahadlok ka sa plano sa amahan sa pagkuha sa custody sa imong anak kay wa man siyay lig-ong basihanan niini.Klaro kaayo nga ang imong anak 5 anyos pa og basi sa balaod kinahanglan nga di kini ibuwag sa inahan.Huwata nalang kun unsay legal nga lakang nga pagahimoon sa amahan apan nakaseguro ko nga ang korte modesisyon basi sa unsay makaayo sa bata ug isip inahan dili ka mamahimong mahikawan sa imong katungod nga maoy mo custody sa bata gawas lang kun adunay bug-at nga mga rason nga ako nang gihisgutan sa unahan .Daghang Salamat.— Atty. Divine

Kining problema sa custody sa bata resulta kini kun ang mga ginikanan magbuwag. Daghan kanato ang nakasinati na sa maong problema nga mapugos ang asawa o bana sa pagbuwag tungod sa pagmaltrato, mga bisyo ug uban pang klase sa pag-abuso nga di na ma-antus sa asawa o bana. Hinaut nga atul ning semana santa, mao sab ni atong pamalandungan kun giunsa nato sa pag-atiman ang atong pamilya ilabi na ang atong mga anak. Ang amahan maoy haligi sa pamilya samtang ang inahan maoy iwag kon suga sa pamilya busa kun mabungkag ang pamilya, ang mga bata maoy grabeng masakitan ug maapektuhan niini. Hinaut nga di kalimtan sa magtiayon ang ilang saad atubangan sa altar nga “for richer or for poorer, in sickness and in health, as long as we both shall live, until death do us part”. LEGAL CORNER, Atty. Divine Marcial-Flores, c/o Banat News, corner D. Jakosalem and V. Gullas Sts., Brgy. Sto. Nino, 6000 Cebu City or email sa [email protected].