EDITORYAL - Si Manny Pacquiao mokiha sa BIR

Si Manny Pacquiao ra ug ang taga BIR maoy nasayud sa ilang problema.

Ang atong nasayran nga gipaningil sa BIR si Manny tungod kay nagkagamay kuno ang gibayad nga buhis niini ngadto  sa gobiyerno.

Mahimong si Manny wa kaayo masinati bahin sa tinuod niyang buhisanan ngadto sa BIR gikan sa iyang mga kinitaan sa pamoksing ug sa uban pa niyang negosyo.

Apan kinsa may naghikay sa iyang buhis, mahimong ang iyang asawa o kaha may gipiyalan siyang lain, angay baya niya kining susihon pag-ayo basin may sipyat siya.

Kay ang BIR bun-og na baya kaayo kini sila sa pagsaway sa publiko, kay maayo tinuod kaayo ni mogukod sa mga gagmay’ng magbubuhis ilabi  na sa mga kawani sa gobiyerno ug pribadong trabahoan kansang kinitaan matawag lang nga igo lang sa hand to mouth existence.

Apan daghan kaayong mga self-employed nga mga propesyonal sama sa mga abogado, doktor, dentist, engineer ug uban pa nga naghilom-hilom lang sa kadagko og kinitaan nga lisud hisakpan sa BIR busa way bayad-bayad sa tukmang buhis.

Sa bahin ni Manny, di baya lisud sakpon sa taga BIR ang iyang kinitaan tungod kay matag kadaog niya sa boksing gikuwenta na sa BIR kun pilay iyang kitaon ug pila usab ang iyang bayranang buhis.

Mao bitaw tingale nga gipangayoan siya sa BIR og mga papeles bahin sa nabayran niyang buhis aron masuta kun nakabayad ba gayud siya sa angay unta niyang bayrunon nga buhis ngadto sa gobiyerno.

Unya standard operating procedure na baya sa taga BIR nga kutob sa mga magbubuhis nga di magtagad sa   ilang mga mando, ila gyung pasakaan og kaso aron adto nila paningla sa korte.

Unya nganong giisip man ni Manny nga gi-harass siya sa BIR, mas maayo baya nga ang iyang mga abogado motin-aw kaniya basin kun tinuod nga may pagkuwang siya unya wa lang siya makaapas sa hustong husay sa iyang problema ngadto sa BIR.

Basin nagdahum siya nga nakabayad na siya sa hustong buhis unya wa diay to.   Di ba?